RÚSSNESKA síðdegisblaðið MK fullyrðir, að Vladímír Pútín, fráfarandi forseti Rússlands, hafi skilið við konu sína, Ljúdmílu, og sé nú kominn með fimleikastjörnuna Alínu Kabajevu upp á arminn.
Pútín er 56 ára en Kabajeva, sem er fræg fyrir sína „liðamótalausu leikni“, er aðeins 24 ára. Var hún kjörin á þing í síðustu kosningum.
Sagt er, að þau Pútín og Kabajeva hafi kynnst fyrst á Ólympíuleikunum í Sydney árið 2000 en þá vann hún til bronsverðlauna. Hún hreppti síðan gullið á leikunum í Aþenu. Segir í blaðinu, að þau ætli að láta gefa sig saman í Pétursborg á sumri komanda eða skömmu eftir að Pútín lætur formlega af embætti sem forseti landsins.
Fréttin í MK sætir allnokkrum tíðindum því að það hefur hingað til ekki verið liðið, að rússneskir fjölmiðlar geri einkalíf æðstu valdamanna að umfjöllunarefni. Í MK var raunar tekið svo til orða, að Pútín hefði tekið Nicolas Sarkozy, forseta Frakklands, sér til fyrirmyndar.