Eftir Hildi Eddu Einarsdóttur
hilduredda@24stundir.is
Þessa dagana taka fjölmargir landsmenn aftur fram hjólhestana sína eftir nokkuð langan og kaldan vetur. Pétur Þór Ragnarsson, formaður Íslenska fjallahjólaklúbbsins, segir það tilfinningu sína að hjólreiðafólki fari mjög fjölgandi þetta árið, enda fullt tilefni til. Hann varar þó við því að æða af stað í hjóltúr að vori án þess að athuga fyrst hvort ekki sé örugglega allt í fínu standi. „Maður þarf ekki að vera neinn sérfræðingur í hjólaviðgerðum til þess að geta yfirfarið hjólin heldur er nóg að hafa fengið smáleiðsögn um helstu atriði sem þarf að hafa í huga,“ segir hann en klúbburinn býður upp á viðgerðanámskeið fyrir byrjendur í klúbbhúsinu að Brekkustíg 2 klukkan 20 í kvöld.
„Í raun er ótrúlega margt sem hinn almenni hjólaeigandi ætti að geta gert sjálfur og það er síst vanþörf á slíku núna þegar biðin eftir hjólaviðgerð getur orðið löng.“
Alltaf hægt
Aðspurður um aðstæður til hjólaiðkunar á höfuðborgarsvæðinu segir hann að þeim sé vissulega ábótavant. „Það fer þó mjög mikið eftir því hvaða leið fólk er að fara. Til dæmis er mjög bein og greið leið frá Árbænum og niður í miðbæ en um leið og menn ætla að hjóla til dæmis frá Árbæ og upp í Grafarholtið þurfa þeir að taka stóran krók á leið sína,“ bendir hann á. Hann bætir því við að sjálfur sé hann bíllaus og setji það ekki fyrir sig að hjóla allra sinna ferða allan ársins hring. „Ég er yfirleitt með aukaföt í vinnunni ef ske kynni að ég skyldi blotna á leiðinni og passa alltaf að klæða mig eftir veðri.“