ÞRÓTTARKONUR úr Neskaupstað urðu í gærkvöld Íslandsmeistarar í blaki þegar þær sigruðu Þrótt úr Reykjavík, 3:1, í oddaleik liðanna um titilinn frammi fyrir ríflega 200 áhorfendum í Neskaupstað. Þær kórónuðu með því glæsilegt tímabil þar sem allir titlarnir féllu þeim í skaut. Þróttarkonur urðu einnig deildarmeistarar og bikarmeistarar, auk þess sem lið ársins í kvennaflokki var eingöngu skipað stúlkum úr Þrótti frá Neskaupstað.
Leikurinn í gærkvöld var æsispennandi allan tímann. Austankonur unnu tvær fyrstu hrinurnar á sama hátt, 26:24, en Þróttur úr Reykjavík vann þriðju hrinuna, 25:19, og staðan var þá 2:1 fyrir heimaliðið. Allt stefndi í að þær reykvísku væru að tryggja sér oddahrinu því þær voru komnar í 24:20 í fjórðu hrinu. Norðfirðingar jöfnuðu metin, 24:24, og tryggðu sér að lokum sigur í hrinunni, 28:26, og þar með Íslandsmeistaratitilinn.