FORRITUNARKEPPNI TM Software árið 2008 var haldin á dögunum á meðal nemenda í háskólanámi. Forritunarkeppnin fór fram á vefnum og höfðu þátttakendur viku til að forrita lausn og skila inn.
Í tilkynningu segir að þrautin hafi verið nokkuð strembin en af 42 nemendum sem skráðu sig til leiks skiluðu aðeins 12 inn lausn.
Í boði voru 150 þúsund krónur fyrir fyrsta sætið, 100 þúsund fyrir annað sætið, 50 þúsund fyrir bronsið. Kári Hreinsson, nemandi við Háskóla Íslands, varð hlutskarpastur, Sigurður Jónsson, samnemandi hans, varð í öðru sæti og Guðmundur Bjarni Ólafsson, sem er við nám í Tækniháskólanum í Danmörku, varð þriðji.
Flestir sem skráðu sig til leiks voru frá Háskóla Íslands, Háskólanum í Reykjavík og Háskólanum á Akureyri en ef tekið er mið af því að nemendur séu við nám í tölvunarfræði þá tóku 30% nemenda við Háskólann á Akureyri þátt, 16% nemenda við Háskóla Íslands og 8% nemenda við Háskólann í Reykjavík.