Harðir á strippinu“ var fyrirsögn á forsíðu 24 stunda í fyrradag, en fréttin var um karlakvöld hestamannafélags þar sem nektardans var meðal atriða. Kristján Bersi Ólafsson orti:
Hestamenn harðir á strippinu
hugsa einlægt með typpinu.
Í reiðskjóta spá
og reyna að ná
tökum á vakrasta trippinu.
Í Hrunamannahreppi er gefið út fréttablað sem nefnist Pési og er sveitarstjórinn Ísólfur Gylfi Pálmason ritstjóri og ábyrgðarmaður. Í nýjasta Pésa er sagt frá því að minkur sást undir sólpallinum hjá sveitarstjóranum. Síðan segir orðrétt: „Gárungarnir töldu þó að vel færi á því að vera með mink undir sólpallinum og pólitískan ref í húsinu.“ Jóhannesi frá Syðra-Langholti kom í hug vorstemning á Flúðum:
Í Flúðaþorpi ríkir ró og friður
úr runnum heyrist lágvær þrastakliður.
Minkur undir sólpallinum sefur,
situr uppi pólitískur refur.
pebl@mbl.is