Tapslagastýring.
Norður | |
♠K87 | |
♥Á2 | |
♦Á63 | |
♣Á9842 |
Vestur | Austur |
♠D9832 | ♠ÁG10 |
♥D95 | ♥KG108643 |
♦74 | ♦2 |
♣DG6 | ♣105 |
Suður | |
♠64 | |
♥7 | |
♦KDG10985 | |
♣K73 |
Norður opnar á sterku grandi og austur stekkur í 3♥. Hindrunin setur suður í vanda en líklega er best að dobla neikvætt til að halda 3G inni í myndinni. Suðri leist hins vegar ekki á doblið með sjölitinn í tígli og sagði 4♦. Norður reyndi við slemmu með 4♥, fékk dræmar undirtektir og sagnir féllu niður í 5♦. Hvernig er best að spila með ♥5 út?
Suður hefur þegar tapað sagnbaráttunni og ef hann drepur á ♥Á þá tapar hann líka í úrspilinu. Spaðaásinn liggur í austur og vestur mun alltaf komast inn á lauf til að þruma spaða í gegnum kónginn. Þetta spil er gott dæmi um tapslagastýringu. Með því að gefa austri fyrsta slaginn á hjarta verður hægt að halda vestri úti í kuldanum. Sagnhafi hendir síðar laufi í ♥Á og fríar lauflitinn með trompun.