Naumur sigur í boði nafnanna

Eftir Sindra Sverrisson

sindris@mbl.is

LEIKUR Hauka og Fylkis á Ásvöllum í gær, í 8 liða úrslitum VISA-bikars karla í knattspyrnu, var jafn og spennandi frá fyrstu mínútu til þeirrar síðustu. Mýmörg færi litu dagsins ljós þrátt fyrir að mörkin hafi látið á sér standa og eftir markalausar 90 mínútur varð að grípa til framlengingar.

Þar reyndist Kjartan Ágúst Breiðdal hetja Fylkis þegar hann kom knettinum í markið eftir sendingu nafna síns, Kjartans Andra Baldvinssonar, og tryggði Fylki 1:0 sigur. Fylkismenn eru því komnir í undanúrslit annað árið í röð.

„Við vissum allan tímann að þetta yrði barátta frá fyrstu mínútu enda eru Haukarnir með hörkulið. Þeir náðu að ógna okkur svolítið í fyrri hálfleik en við komum af miklu meiri krafti inn í seinni hálfleikinn og vorum óheppnir að skora ekki. Það var ekkert vanmat hjá okkur heldur sáum við hvað vantaði upp á hjá okkur í fyrri hálfleik og bættum bara úr því í þeim seinni,“ sagði markaskorarinn Kjartan Ágúst, og orð hans má til sanns vegar færa því Haukar náðu nokkrum frábærum skyndisóknum í fyrri hálfleik sem þeir hefðu betur nýtt. Þar var markahæsti maður 1. deildar, Denis Curic, jafnan á ferðinni og honum tókst með hraða sínum að komast í nokkur úrvalsfæri einn á móti markverði án þess þó að skora.

Fylkismenn mættu hins vegar mun einbeittari til seinni hálfleiks og réðu lögum og lofum lengst af. Mörkin létu hins vegar á sér standa allt þar til Kjartan Ágúst skoraði loks í framlengingunni. Gott mark og ekki voru síðri breikdanstaktarnir sem hann sýndi í kjölfarið.

„Það er alltaf gott að skora en aðalmálið er náttúrulega að liðið vinni. Þetta fagn var nú bara eitthvað djók á æfingu í gær og Þórir [Hannesson] lofaði nú að gefa mér kippu fyrir að gera þetta,“ sagði Kjartan Ágúst.