HJÖRTUR Hjartarson, tölvutæknifræðingur og kaupmaður, lést 24. júlí sl. Hann fæddist 23. desember 1929 í Reykjavík.
Foreldrar hans voru Ásta L. Björnsdóttir frá Ánanaustum fædd 24. nóv. 1908 og Hjörtur Hjartarson stórkaupmaður fæddur 31. okt. 1902.
Hjörtur var einn af frumkvöðlum tæknideildar IBM á Íslandi og starfaði þar í 33 ár. Í tvö ár var hann framkvæmdastjóri tæknideildar IBM hjá Sameinuðu arabísku furstadæmunum með aðsetur í Dubai. Þegar Hjörtur lauk störfum hjá IBM hóf hann eigin rekstur ásamt eiginkonu og syni, innrömmunina Hjá Hirti, sem þau starfræktu til 1. febrúar 2008.
Hjörtur var sannur KR-ingur, stundaði knattspyrnu og skíðaíþróttina í mörg ár hjá því félagi.
Hann var einn af stofnendum Rótarýklúbbs Seltjarnarness, virkur þátttakandi í starfi Sjálfstæðisfélags Seltjarnarness og gegndi ýmsum trúnaðarstörfum á þess vegum. Hjörtur var einn af stofnendum siglingaklúbbsins Sigurfara á Seltjarnarnesi og formaður um skeið. Hann var lærður vélstjóri og starfaði á yngri árum á Arnarfellinu. Á námsárunum starfaði hann hjá Hval hf. Hann var meðal stofnenda Sparisjóðs Vélstjóra.
Eftirlifandi eiginkona Hjartar er Jensína (Jenný) Guðmundsdóttir frá Sæbóli á Ingjaldssandi. Börn þeirra eru Drífa, bóndi og fyrrverandi alþingismaður, Ingibjörg glerlistamaður, Hjörtur, grafískur hönnuður, látinn 7. nóv. 2007, Anna Ásta, viðskiptastjóri hjá SPRON, Björn Grétar verslunarmaður og Guðmundur Ingi, framkvæmdastjóri Netheims.