Sporna gegn innbrotum og tjóni

Eftir Ylfu Kristínu K. Árnadóttur

ylfa@mbl.is

BÚIÐ er að setja á laggirnar nágrannavörslu í Grundarhverfi á Kjalarnesi en þetta er í fyrsta skipti sem farið er af stað með slíkt átak í heilu borgarhverfi. Um er að ræða samstarfsverkefni milli íbúa hverfisins, lögreglunnar og Reykjavíkurborgar. Áður hefur nágrannavarsla farið fram í einstökum götum borgarinnar og almennt hefur mikil ánægja verið með það.

Marta Guðjónsdóttir, formaður hverfisráðs Kjalarness, segir verkefnið fyrst og fremst hugsað sem forvörn en lítið sé um innbrot á Kjalarnesi. „Markmiðið með verkefninu er í raun að aðstoða borgarbúa við að stuðla að auknu öryggi og taka höndum saman um að sporna gegn innbrotum og eignatjóni.“

Marta segir að þótt sjálfsprottin nágrannavarsla finnist víða, fari formleg nágrannavarsla þannig fram að í upphafi sé haldinn undirbúningsfundur með íbúum þar sem þeir fái afhenta sérstaka límmiða til að setja í rúður í húsum sínum en á þá hefur verið prentað merki nágrannavörslunnar sem er samræmt um landið allt.

Þá eru sett upp sérstök nágrannavörsluskilti í hverja einustu götu þar sem nágrannavarslan er fyrir hendi. Sérstakir götustjórar eru valdir sem þjóna hlutverki tengiliða lögreglu og íbúa. Hlutverk þeirra er að upplýsa nágranna sína eigi eitthvað óeðlilegt sér stað og upplýsa einnig lögreglu verði þeir varir við grunsamlegar mannaferðir.

Kemur ekki í stað öryggisvarna

„Nágrannavarslan er góð að því leytinu til að innbrotsþjófar sem átta sig á því að það er nágrannavarsla í götu eða hverfi eru fljótir að koma sér í burtu ef þeir sjá að það er fylgst vel með,“ segir Marta. Hún segir að auk þess að vera forvörn gagnvart innbrotum geti nágrannavarslan einnig komið í veg fyrir ýmiss konar eignaspjöll, t.d. rúðubrot og veggjakrot.

„Þetta kemur ekki í staðinn fyrir venjulegar öryggisvarnir, heldur lítum við á þetta sem góða viðbót við það,“ segir Marta og segir að ekki aðeins hvetji nágrannavarslan íbúa hverfisins til að vera frekar á varðbergi, heldur hafi reynslan sýnt að hún auki samkennd meðal íbúanna og geri þá nánari. „Í þeim götum þar sem tilraunaverkefnið fór af stað hafa íbúar haldið götugrill einu sinni á ári þannig að þetta hristir nágrannana saman.“

Spurð hvort eigi að koma upp nágrannavörslu í fleiri hverfum borgarinnar segir Marta að það standi til í ákveðnum hverfakjörnum frekar en hverfum í heild sinni. „Málið er að Reykjavíkurborg getur haft frumkvæði að því að koma upp nágrannavörslu í einstökum hverfum eða götum en frumkvæðið getur líka komið frá íbúunum sjálfum. Ef þetta gefst vel á ég von á því að sem flestir vilji fá svona nágrannavörslu.“