Kings of Leon Ótrúlegur dugnaður og óbeisluð sköpunargáfa hefur gert sveitina eina af stærstu rokksveitum heims. Only by the Night hefur alla burði til þess að verða þeirra mest selda plata frá upphafi.
[ Smellið til að sjá stærri mynd ]
Eftir Birgi Örn Steinarsson biggi@24stundir.is Sívaxandi vinsældir bræðrabandsins Kings of Leon hafa komið öllum að óvörum.

Eftir Birgi Örn Steinarsson

biggi@24stundir.is

Sívaxandi vinsældir bræðrabandsins Kings of Leon hafa komið öllum að óvörum. Ekki síst liðsmönnum sjálfum, er störðu undrandi á áhorfendaskarann á Hróarskeldu á meðan þeir hristu hvern slagarann á fætur öðrum fram úr erminni.

Á okkar tímum þegar flestar nýjar sveitir berjast við að hrinda af stað eða vera hluti af nýrri tónlistarstefnu hefur þessi eytt púðri sínu í að halda í hefðina. Frá fyrstu plötu hafa engar tilraunir verið gerðar til þess að tileinka sér ný tækniundur eða að missa sig í stórtækar útsetningar. Þess í stað virðist allt vera lagt í grípandi söng- og gítarlínur.

Nú er hljómurinn orðinn ögn dýrari og söngurinn hefur aldrei verið jafn framarlega í blönduninni.

Oftast merki þess að sveitir séu að reyna höfða til fjöldans. En það myndi að sjálfsögðu aldrei draga neinn í land ef lögin væru prump.

Kveikt í kyni

Hlustandanum er strax gert ljóst í upphafslagi plötunnar, Closer, að Kings of Leon sé komin í úrvalsdeild. Undirspilið er byggt upp á afar einföldu þriggja nótna gítarstefi sem rennur í gegnum hljóðeffekt og sveimar yfir þungum trommuslögum. Stórt rými lagsins er svo fyllt upp með ærslafullri gítarsúpu og ótrúlegum söng lagahöfundarins Caleb Followhill er hefur aldrei hljómað betur.

Strax í öðru laginu, Crawl, er hlustandanum svo gert ljóst að sveitin er ekki að reyna að gera einhverja hlustendavæna bónusútgáfu af sjálfri sér í von um að ná til víðari hóps. Þeir ætla að ryðjast til eyrna ykkar á eigin forsendum.

Það sem hefur skotið sveitinni fram yfir aðrar í vinsældum er einmitt hversu vel var í grunninn lagt í upphafi. Á leiðinni hefðu þeir auðveldlega getað fyllst af eigin ágæti og ákveðið að færa sig meira út í listræna tilburði í von um að hafa djúpstæð áhrif á tónlistarsöguna með tilviljunarkenndri snilli sinni. Slíkt er mjög algengt hjá sveitum sem eru komnar á fjórðu plötu. Það virkar oft vel, en hefði verið dauðadómur fyrir sveit með jafn sterkar rætur í bandarískri sönglagahefð og þessi þar sem allt snýst um að fanga hlustandann með sönglínum sem auðvelt er að raula með. Hér færðu það sem þú býst við, bara í meiri gæðum. Árin í gospelkórnum hjá pabba hafa svo sannarlega borgað sig.