Eftir Auði Alfífu Ketilsdóttur
fifa@24stundir.is
„Það er ótrúlegt að borga 125 þúsund krónur í afborganir á mánuði en þrátt fyrir það hækki lánið um 170 þúsund á mánuði,“ segir maður sem í mars 2006 tók lán hjá Landsbankanum upp á 22,8 milljónir. Á 30 mánuðum hefur höfuðstóllinn hækkað um 4,9 milljónir þrátt fyrir að hann hafi borgað á fjórðu milljón í afborganir. „Maður nær seint í endann á þessu láni,“ segir hann.
Þorkell Kristinsson hefur svipaða sögu að segja. Hann tók 12,9 milljóna lán hjá Íbúðalánasjóði í mars 2005. Eftirstöðvar eftir síðustu afborgun voru 16,1 milljón. Mánaðarlegar afborganir hafa að sama skapi hækkað, voru 56 þúsund upphaflega en eru nú 71 þúsund.
Ögmundur Jónasson var í forsvari fyrir Sigtúnshópinn svokallaða fyrir 25 árum. Hann segir sömu hættumerki á lofti nú og þá.
„Þá hækkuðu lánin meira en verðgildi eignanna og vísitölutengingu launa var hætt, svo þau hækkuðu ekki í samræmi.
Við þessu dugir ekkert annað en sameiginlegt átak til að ná niður verðbólgu og auka jöfnuð.“