Íbúðalán bankanna 483 milljónir í ágúst
Til samans gáfu innlánsstofnanir út 43 íbúðalán í ágúst sem jafngildir um tveimur lánveitingum á dag þá tuttugu viðskiptadaga sem voru í mánuðinum. Heildarupphæðin var 483 milljónir eða tæpur einn tíundi af útlánum Íbúðalánasjóðs (ÍLS) í sama mánuði samkvæmt upplýsingum frá Seðlabanka Íslands og mánaðarskýrslu Íbúðalánasjóðs.Samkvæmt skýrslu ÍLS voru almenn útlán 4,3 milljarðar króna og meðalútlán 10,9 milljónir króna sem benda til að lánveitingar hafi verið í kringum 400. Íbúðalán innlánsstofnana hafa dregist jafn og þétt saman á þessu ári og hafa síðustu þrjá mánuði verið á svipuðu róli í kringum 45 lán á mánuði. Meðallánsupphæð hækkaði hins vegar nú í ágúst frá júlí og var 11,2 milljónir króna, að því er segir í Hálffimmfréttum Kaupþings.
Gæti bjargað fjölskyldum frá gjaldþroti
Félagsmálaráðherra skoðar nú hvort heimila eigi Íbúðalánasjóði að endurfjármagna íbúðalán sem tekin voru hjá bönkunum á sínum tíma. Slíkt myndi bjarga mörgum heimilum frá gjaldþroti en Íbúðalánasjóður leyfir viðskiptavinum sínum að frysta lán í allt að þrjú ár vegna greiðsluerfiðleika.Þeir sem tók níutíu prósenta lán hjá bönkunum fyrir tveimur árum til að kaupa húsnæði horfa margir hverjir fram á það að höfuðstóll lánsins er orðinn hærri en verðmæti húsnæðisins. Það sem verra er, þverrandi kaupmáttur gerir það að verkum að fólk hættir að geta staðið í skilum. Þótt Íbúðalánasjóðslánin séu verðtryggð ekki síður en bankalán er hægt að frysta þau í allt að þrjú ár í von um batnandi tíð.
Reynir tré septembermánaðar
Dómnefnd Skógræktarfélagsins taldi að ekki yrði horft framhjá hinum sígilda reynivið nú í september, svo áberandi og glæsilegur er hann í borginni. Tré mánaðarins er því reyniviður (Sorbus aucuparia) í garði við Vorsabæ 15 í Árbæjarhverfi. Þar stendur hann stakur framan við húsið og bregður svip á hverfið, farinn að nálgast miðjan aldur ef að líkum lætur, hlaðinn berjum og allur hinn kröftugasti.Hann er 9,55 metrar á hæð og ummálið í eins metra hæð frá jörðu er 1,17 m. Þvermál krónu er um 6 m. Auður Sjöfn Tryggvadóttir og Pétur Vilhjálmsson byggðu Vorsabæ 15 árið 1967 og gróðursettu reyniviðinn líklega 1969 og var hann keyptur í Fossvogsstöðinni. Núverandi eigendur eru Ásta Guðmundsdóttir og Jan Inge Lekve. Ekki er vitað til að Vorsabæjarreynirinn hafi fengið sérstaka meðhöndlun utan venjulegrar umhirðu, hann er einfaldlega rétt tré á réttum stað, að því er segir í umsögn dómnefndar.