Brids - Guðmundur Páll Arnarson | ritstjorn@mbl.is

Sofið í vörninni.

Keppendur í butler -tvímenningi BR sl. þriðjudag sýndu almennt þá hógværð að spila bút í spaða og taka þar átta slagi. Meira er ekki að hafa og raunar minna ef sagnhafi gætir sín ekki. Á tveimur borðum varð suður sagnhafi í 2♠ eftir multi -opnun norðurs á 2♦ og „leitandi“ 2♠-svar suðurs.

Vestur hitti á góða vörn með því að taka ♦ÁK og spila þriðja tíglinum. Það blasir ekki við, en sagnhafi verður helst að taka strax á ♠ÁK. En það gerðist ekki. Báðir sagnhafar svínuðu fyrst í hjarta. Vestur drap og spilaði laufi. Nú er sviðið sett fyrir skemmtilega brellu. Austur verður að taka á ♣Á og spila tígli, sem vestur trompar með drottningu. Við það uppfærist sjötti varnarslagurinn á tromp. En nei, báðir austurspilarar sváfu værum blundi og létu ♣G í slaginn.

Synd og skömm.