Gunnlaugur Júlíusson
[ Smellið til að sjá stærri mynd ]
Eftir Sigrúnu Hlín Sigurðardóttur sigrunhlin@mbl.

Eftir Sigrúnu Hlín Sigurðardóttur

sigrunhlin@mbl.is

GUNNLAUGUR Júlíusson, 56 ára fjölskyldufaðir í Rauðagerðinu í Reykjavík, vann um helgina það ofurmannlega afrek að hlaupa 246 kílómetra frá Aþenu til Spörtu á 34 klukkustundum, 12 mínútum og 17 sekúndum. Vegalengdin er svipuð og frá Reykjavík á Kirkjubæjarklaustur. Gunnlaugur var í 74. sæti af 154 sem komust í mark.

Sigurvegari Spartathlon-keppninnar, þriðja árið í röð, var Bandaríkjamaðurinn Scott Jurek, sem hljóp á tímanum 22:20:07. Þátttakendur verða að ljúka hlaupinu innan 36 klukkustunda, en ekki nærri öllum tekst að ljúka keppni. Gunnlaugur hljóp viðstöðulaust og nam aðeins staðar á þriggja klukkustunda fresti til að næra sig. Í hvert sinn drakk hann hálfan lítra af Herbalife-próteindrykk.

Allt verður að ganga upp

Gunnlaugur reyndi við þetta sama hlaup í fyrra en varð að hætta keppni eftir 150 kílómetra þar sem hitinn reyndist honum óbærilegur. Fyrir þessa keppni æfði hann því dúðaður inni á hlaupabretti. Í þessari keppni var heppnin hins vegar með Gunnlaugi og hitinn var í kringum 26–28 gráður. Allt gekk sem skyldi, en að sögn Gunnlaugs þurfa ótal púsluspil að falla á réttan stað svo að mönnum takist að ljúka keppni sem þessari. Margt getur farið úrskeiðis, menn geta fengið heiftarlega í magann, ofþornað og fengið blöðrur og sinadrátt.

Söguleg hlaupaleið

Leiðin er á köflum afar erfið, en meðal annars er hlaupið upp á fjallið Parthenio, sem er 1200 metrar yfir sjávarmáli. Leiðin er byggð á lýsingu forngríska sagnaritarans Heródótosar á ferðalagi sendiboða Aþeninga, Feidippídesar, sem lagði af stað frá Aþenu til að kalla eftir hjálp Spartverja í stríði gegn innrásarmönnum frá Asíu og kom til Spörtu daginn eftir. Innblásturinn er því sóttur á svipaðar slóðir og hugmyndin um maraþonhlaup. Stórhuga Bretar með hlauparann John Foden í fararbroddi byrjuðu að þróa leiðina sem hlaupin er í Spartaþloninu árið 1982.

Gunnlaugur byrjaði markvissan undirbúning undir keppnina um áramótin. Hlaupið er það lengsta sem Gunnlaugur gat fundið þar sem hlaupið er frá einum stað til annars. Næsta áskorun Gunnlaugs verður því að finna verðugt markmið til að keppa að næst.

Þeir sem vilja æfa hlaup geta valið úr fjölda hlaupahópa

Langhlaup njóta sívaxandi vinsælda meðal almennings. Þótt slík hlaup séu í eðli sínu einstaklingsíþrótt er ekki þar með sagt að það þurfi að vera einmanalegt að æfa hlaup – raunar þvert á móti. Á vefsíðunni hlaup.is eru skráðir 27 hlaupahópar, þar af 17 sem starfræktir eru á höfuðborgarsvæðinu.

Hlaupahóparnir eru opnir öllum sem vilja spretta úr spori í góðum félagsskap. Í sumum tilvikum stjórna þjálfarar æfingum með misharðri hendi en í öðrum hópum eru það einungis hlaupafélagarnir sem veita aðhaldið. Aðhaldið og félagsskapurinn sem fæst í góðum hlaupahópi eru flestum ef ekki öllum hvatning til að leggja harðar að sér en ella.

Einnig eru starfræktir hlaupahópar víðs vegar um landsbyggðina. Á Akureyri eru tveir, einn á Dalvík og einn á Sauðárkróki. Tveir hópar eru á Austfjörðum, þ.e. einn á Vopnafirði og annar í Neskaupstað. Þá er hlaupið í hóp frá Úthlíð í Biskupstungum, Selfossi, Grindavík og Ísafirði. Þeir sem ekki finna hlaupahóp í sínum bæ eða hverfi geta safnað saman kunningjum og stofnað sinn eigin. Á hlaupadagbókinni www.hlaup.com má sjá að 41 hlaupahópur færir þar til bókar æfingar sínar, en félagafjöldi hópanna er allt frá tveimur upp í 27. Alls halda 644 Íslendingar skrá yfir hlaup sín á síðunni.

Æfingar hlaupahópanna eru flestar í hádeginu og síðdegis svo vinnandi fólk ætti ekki að vera í vandræðum með að bregða sér í hlaupaskóna í matartímum eða eftir vinnu.

Nánari upplýsingar um hlaupahópa á landinu má fá á vefsvæðinu www.hlaup.is.