Vonbrigði beggja

Eftir Sindra Sverrisson

sindris@,mbl.is

KR-ingar eiga þó enn inni möguleika á að komast í Evrópukeppni því þeir leika til úrslita í bikarkeppninni gegn Fjölni um næstu helgi og Óskar Örn Hauksson, sem skoraði eina mark leiksins á laugardaginn og sýndi góð tilþrif á vellinum, er ánægður með sumarið.

„Miðað við síðasta sumar er maður náttúrlega ánægður en það hefði verið meira gaman að enda í þriðja sæti. Heilt yfir er maður samt alveg sáttur.Við eigum annan séns á að fara í Evrópukeppni og ætlum að nýta okkur hann,“ sagði Óskar Örn. Pétur Marteinsson félagi hans tók í sama streng.

„Ég er nokkuð sáttur en það verður auðveldara að svara þessari spurningu eftir næstu helgi. Við vorum ekki fullkomlega tilbúnir í byrjun móts en á heildina litið finnst mér við hafa náð ljómandi fínum árangri,“ sagði Pétur, sem var svekktur yfir úrslitunum í Keflavík.

„Það var frekar pirrandi. Maður bjóst náttúrlega við að Keflavík tæki stig af Fram en maður getur ekkert gert annað en óskað Frömurum og FH-ingum til hamingju. Eina sem við gátum gert var bara að sigra hérna og það er nú ekki hlaupið að því á Hlíðarenda. En mér fannst við spila vel og vinna nokkuð sannfærandi,“ sagði Pétur.

Valsmaðurinn Guðmundur Benediktsson var að vonum vonsvikinn í leikslok. „Þetta eru að sjálfsögðu vonbrigði. Stefnan var að vinna titilinn aftur en í staðinn lentum við í fimmta sæti. Það er mjög leiðinlegt en að sjálfsögðu óskum við FH-ingum innilega til hamingju. Það er ekkert annað í stöðunni fyrir okkur en að snúa bökum saman og koma sterkari til baka á næsta ári,“ sagði Guðmundur, sem stefnir á að halda áfram. „Á meðan líkaminn er í þokkalegu lagi langar mig að spila áfram.“