Kraumandi innrás

Eftir Arnar Eggert Thoroddsen

arnart@mbl.is

Hljómsveitirnar Bloodgroup og Skátar leggja í hringferð um landið í kvöld ásamt fleiri sveitum. Fyrstu tónleikarnir eru á Egilsstöðum.

Tónleikarnir eru liður í Innrásarátaki styrktarsjóðsins Kraums sem miðar að því að byggja undir frekara tónleikahald úti á landi og hafa nokkur áhlaup verið gerð nú þegar á þessu ári.

Eldar Ástþórsson, framkvæmdastjóri Kraums, segir að hugmyndafræðin á bakvið innrásina felist í því að hjálpa sveitum að spila meira úti á landi.

„Það getur verið æði kostnaðarsamt og þar kemur Kraumur til,“ segir Eldar. „Það hefur líka sýnt sig að það er akkur í þessu fyrir listamennina. Að maður tali ekki um fyrir viðkomandi sveitarfélög, en dæmi eru um að heilu hljómsveitirnar hafi verið stofnaðar í kjölfar heimsókna af þessu tagi. Þá skiptir líka máli að rækta bakgarðinn, það er ekki endilega málið að fara rakleitt á einhverja klúbba í London eða Amsterdam. “

Aðrir bakhjarlar þessa tiltekna ferðalags eru Rás 2 og Ölgerðin.