Exista og Bakkavör selja eignir erlendis

Eftir Guðnýju Camillu Aradóttur

camilla@mbl.is

EIGNARHALDSFÉLAGIÐ Exista seldi í gær tæplega 20% hlut sinn í finnska tryggingafélaginu og bankanum Sampo. Bókfært tap vegna sölunnar verður 1,4 milljarðar evra á fjórða ársfjórðungi.

Um miðjan dag í gær var tilkynnt að hlutirnir væru seldir og var söluverðmætið um 1,3 milljarður evra. Skuldir Exista lækka því sem því nemur. Samkvæmt sex mánaða uppgjöri félagsins lækkuðu skuldir þess um einn milljarð frá síðustu áramótum.

Lýður Guðmundsson, stjórnarformaður Exista, segir söluna greiða fyrir stýringu félagsins í þeim erfiðu aðstæðum sem ríki á fjármálamörkuðum. Ekki séu áætlanir um frekari sölu eigna.

Bakkavör, sem er að hluta til í eigu Exista, seldi einnig í gær tæplega 11% hlut sinn í írska samlokuframleiðandanum Greencore. Söluverðmætið nemur rúmum 28,6 milljónum evra. Hlutur Bakkavarar í félaginu var á fyrri hluta árs metinn á um 10 milljarða króna.

Baugur selur ekki

Jón Ásgeir Jóhannesson, stjórnarformaður Baugs Group, segir sölu erlendra eigna Baugs ekki fyrirhugaða.

„Nei, það væri alveg fráleitt miðað við hvernig markaðurinn er í dag. Ef þú ætlar að eyðileggja eigur, þá selurðu þær í dag,“ segir Jón Ásgeir. „Það er enginn markaður fyrir svona eigur í dag.“ Markaðurinn í dag sé ekki seljendamarkaður.

„Við eigum góð fyrirtæki sem eru að afla gjaldeyris fyrir Íslendinga erlendis þannig að við verðum að halda í þau. Þau hafa aldrei verið verðmætari en núna.“