[ Smellið til að sjá stærri mynd ]
Börnin verða fyrir áhrifum neikvæðninnar sem fylgir efnahagsástandi Íslands. Það er mikilvægt að rifja upp þau gildi og vermæti sem skipta mestu máli. Skoða gömul myndaalbúm og rifja upp góðar minningar.

Eftir Kristínu Ýri Gunnarsd.

kristing@24stundir.is

Foreldrar ættu að vera opnir og heiðarlegir gagnvart börnum sínum. Ræða málin af hreinskilni og fá upplifun barnanna á ástandinu. Þetta segja séra Bjarni Karlsson, sóknarprestur í Laugarneskirkju, séra Gunnar Sigurjónsson, sóknarprestur í Digraneskirkju, og Hannes Jónas Eðvarðsson, sálfræðingur og félagsráðgjafi hjá Geðhjálp, um það ástand sem er í efnahagslífinu í dag og hvernig hægt sé að verja börnin okkar fyrir neikvæðninni sem þessu fylgir.

Rifja upp gildi og verðmæti

Séra Bjarni segir að í samskiptum foreldra og barna við núverandi aðstæður sé mikilvægt að rifja upp og kenna börnunum þau gildi og verðmæti sem eru stærst og best. Þau verðmæti sem skipta okkur mestu máli og leggja grunninn að hamingju okkar eru ekki á markaði og þ.a.l. verða þau ekki fyrir skakkaföllum þótt fjármálakerfið laskist.

„Góð leið til þess að gera þetta er sú að skoða myndaalbúmið saman, rifja upp ánægjulegar stundir og líka erfið tímabil,“ segir hann.

Breytum um áherslur

„Nú þarf að endurskipuleggja líf sitt og breyta aðeins um áherslur. Eyða meiri tíma með börnunum og ræða málin við þau á þeirra getustigi,“ sagði Hannes hjá Geðhjálp.

„Það þarf að draga úr þessari lýsingarorðaumræðu sem er í fjölmiðlum. Þessi stóru og miklu orð hafa mun meira vægi í hugum barna en okkar. Við þurfum að ræða við þau um það raunverulega, að þau muni halda áfram í skólanum og að mamma og pabbi verði áfram til staðar þó fréttirnar séu svona neikvæðar.“

Spjöllum í stað þess að þegja

Gunnar segir að fyrst og fremst eigum við að gera eins og Geir H. Haarde forsætisráðherra sagði: foreldrar eiga að gefa sér tíma til að ræða við börnin sín, þau heyra og finna að það eru erfiðleikar í gangi. Notum tækifærið og stöndum vörð um fjölskylduna. Mikilvægt er að vera til taks fyrir börnin og unglingana. Það borgar sig að spjalla, ekki þegja um hlutina og nýta sér líka þá ráðgjöf sem er í boði til þess að fá ráð. Það er engin lífshætta á ferðinni. Við verðum að sýna samstöðu og gefa von.
Í hnotskurn
Tölum um muninn á lúxus og nauðsynjum. Kennum börnunum að nauðsynjar munum við hafa, en munaðinn þarf að skammta. Í stað þess að hugsa frá sjónarhóli erfiðleikanna er gagnlegra að horfa á lífið frá sjónarhóli möguleikanna. Spjöllum saman á forsendum barnsins.