Brids - Guðmundur Páll Arnarson | ritstjorn@mbl.is

Létt dobl.

Ísland tapaði 13-17 fyrir Póllandi í annarri umferð heimsleikanna (World Bridge Games) í Beijing. Munaði þar mestu um tvær harðar slemmur, sem Pólverjar sögðu og unnu. Í spilinu að ofan var Krzysztof Martens hins vegar einum of gráðugur. Makker hans vakti í vestur á Precision 2♣ og Hrannar Erlingsson kom inn á 2♥. Sveinn Rúnar Eiríksson krafði með 2♠ og sagði svo 3G við 3♥ Hrannars. Sú sögn gekk til Martens í austur, sem doblaði.

Níu slagir eru öruggir, en þar eð slík dobl eru iðulega byggð á styrk í líflit blinds kom Krzysztof Jassem út með ♥2. Sveinn þakkaði fyrir sig með því að taka tíu fyrstu slagina og 950 fyrir spilið. Á hinu borðinu spiluðu Pólverjar 4♥ og unnu fimm (650), þannig að Ísland vann 7 IMPa á spilinu.