GESTIR þáttarins Orð skulu standa þessa vikuna eru Benedikt Jóhannesson framkvæmdastjóri og Helgi Hafliðason arkitekt. Auk þess að fást við m.a. „eftirburð“ og „Amazon“ botna þeir þennan fyrripart, ortan í óskiljanlegu bjartsýniskasti:
Þjóðarskútan þolir allt,
það er engin kreppa.
Í liðinni viku var fyrriparturinn svona:
Í brimskaflinum boðaföll
brotna á eyðiskeri.
Í þættinum botnaði Hlín Agnarsdótir:
Nú heyrast ekki hlátrasköll,
nú hrynur allt úr gleri.
Kristín Benediktsdóttir:
Siðblint fól í svartri höll
situr og klínir sméri.
Davíð Þór Jónsson:
Hjartað nísta neyðarköll
nú í októberi.
Eiríkur Stephensen:
Breyttir tímar í Björgólfs höll
á borðum falskur héri.
Nú gjaldeyrinn við geymum öll
í gömlu koddaveri.
Úr hópi hlustenda botnaði Hreinn Þorkelsson m.a.:
Senn er skrifuð sagan öll
sannleikans í kveri.
Ríkisstjórnin riðar höll
ríður á haltri meri.
Hallberg Hallmundsson:
Heyrast neyðarhróp og -köll
úr hverri byggð og veri.
Björgólfanna er hrunin höll.
Hún reyndist úr gleri.
Geir Gunnarsson sendi þennan:
Gordon Brown í hárri höll
höndum saman neri.
Þorkell Skúlason í Kópavogi:
Þjóðar vorrar auðnan öll
engan skaða beri.
Auðunn Bragi Sveinsson:
Voðaleg þau vinna spjöll,
verri en heiftar-freri.
Þrautum pínd er þjóðin öll,
þó að lítt á beri.
Ólafur Þórir Auðunsson m.a.:
Græðgisfár í glæsihöll
gleymt nú ætíð veri.