Eftir Björn Jóhann Björnsson
bjb@mbl.is
BALDUR Brjánsson töframaður mun framkvæma „uppskurð“ á Græna hattinum á Akureyri næstkomandi föstudagskvöld en nokkur ár eru liðin síðan hann „skar upp“ síðast opinberlega.
Sjúklingurinn er ekki gefinn upp á þessari stundu né hvaða „meinsemd“ töframaðurinn hyggst fjarlægja úr líkamanum. Meðal þeirra sem koma til greina eru þekktur verslunarmaður norðan heiða eða málsmetandi læknir.
„Ég ætla bara að mæta og gera þetta eftir bestu kunnáttu. Einhverja meinsemd ætla ég að taka úr manninum,“ segir Baldur.
Þrjátíu ár eru liðin síðan hann sýndi þetta töfrabragð frammi fyrir alþjóð í Sjónvarpinu, eða í apríl 1978, þegar mikil umræða var um andaskurðlækningar á Filippseyjum. Hundruð Íslendinga höfðu þá leitað sér „lækninga“ á þeim slóðum og margir töldu sig hafa fengið bót meina sinna. Baldur vildi með atriði sínu í Sjónvarpinu sýna fram á að um sjónhverfingar væri að ræða hjá þessum „læknum“ á Filippseyjum.
Fer með leyndarmálið í gröfina
Út er komin ævisaga Baldurs, Töfrum líkast, rituð af Gunnari Kr. Sigurjónssyni, töframanni með meiru, sem Bókaútgáfan Hólar gefur út. Þar er farið yfir feril töframannsins í leik og starfi.Aðspurður segist Baldur hafa dregið úr störfum sínum sem töframaður en hann haldi sig þó við efnið reglulega. Hann var meðal stofnenda Hins íslenska töframannafélags á síðasta ári. Eru félagsmenn nú orðnir um 25 talsins.
Enginn íslenskur töframaður hefur leikið eftir uppskurð Baldurs, enda hefur hann ekkert verið að upplýsa hver sé galdurinn. „Ætli ég taki ekki leyndarmálið með mér í gröfina,“ segir Baldur og hlær.