Brids - Guðmundur Páll Arnarson | ritstjorn@mbl.is

Talið upp í þrettán.

Suður spilar 4♠.

Þeir voru margir sagnhafarnir í síðustu umferð Íslandsmótsins sem nutu aðstoðar varnarinnar í þessu spili – fengu til dæmis út ♣Á, sem leysir höfuð sagnhafa í einu vetfangi. Aðrir gáfu tvo slagi á lauf og fóru einn niður. Nema þó Björn Eysteinsson, en hann spilaði samninginn úr norðuráttinni eftir opnun á minigrandi (10-12) og yfirfærslu á móti. Vestur doblaði yfirfærslu suðurs og austur kom út með ♥2 – þriðja hæsta í lit makkers. Þar með var hjartastaðan upplýst. Björn þreifaði svo fyrir sér, sótti ♦Á meðfram tromptökunni og komst að því að vestur átti tvílit í tígli og þrjá spaða. Vestur var því upptalinn með nákvæmlega tvö lauf. Íferðin var þar með ráðin: lítið á kóng og lauf í bláinn. Engu er til kostað, því ef vestur á ♣Gx skilar gosinn í drottninguna.