Eftir Einar Sigtryggson
sport@mbl.is
Úr vítaspyrnunni skoraði David Disztl og var það sigurmark leiksins. Fyrir leikinn var Gunnar Níelsson, hinn landsfrægi stuðningsmaður KA, búinn að fletta í sögubókunum og finna út að KA hafði hvorki fengið vítaspyrnu í deild né bikar í heil tvö ár. Leikirnir voru orðnir 47 en eftir 4.289 mínútna vítaþurrð flautaði Þóroddur Hjaltalín vítaspyrnu þegar boltinn hrökk í höndina á varnarmanni Aftureldingar. Vissulega nokkuð harkalegt en KA-menn voru lítið að velta því fyrir sér.
Annars var leikurinn fremur tíðindalítill, jafnræði lengstum í fyrri hálfleik en undir lok hans fór að draga til tíðinda. Gestirnir skoruðu fyrst eftir að hafa fengið gefins horn. Í horninu virtist sem brotið hefði verið á Sandor Matus þannig að hann náði ekki í boltann. Knötturinn féll hins vegar á tærnar á Alberti Ásvaldssyni sem potaði honum í autt markið. KA jafnaði um hæl þegar David Disztl var fyrstur á boltann eftir hornspyrnu sem kom niðri á nærstöng. Í seinni hálfleiknum voru heimamenn mun sterkari en sköpuðu lítið af færum. Það var svo vítið fræga sem dæmt var á 56. mínútu sem gerði gæfumuninn og KA náði þremur stigum í hús.
Haukur Heiðar Hauksson, hinn þindarlausi sóknarbakvörður KA, var sáttur með niðurstöðuna og ákveðinn í að halda áfram á sigurbraut. „Þetta var baráttuleikur og góður sigur hjá okkur. Við erum búnir að vera í basli í síðustu leikjum en sýndum karakter með því að sigra Fjarðabyggð fyrir austan með vængbrotið lið og erum nú komnir aftur í rétta gírinn. Næsti leikur við Hauka er mjög mikilvægur og þar ætlum við að taka þrjú stig og ekkert annað.“ Spurður um vítaspyrnudóminn sagði Haukur Heiðar: „Ég var ekki búinn að sjá umræðuna á netinu um þetta en vissi bara að það var langt síðan síðasta víti var dæmt. Ég hef ekki hugmynd um hvort umræðan hefur haft nokkur áhrif á dómarann eða að hann hefur vitað af henni. Ég efast nú um það en hins vegar eigum við að vera búnir að fá einhver víti í sumar svo við áttum nú alveg innistæðu fyrir þessu.“ Með það kvaddi Haukur sæll með afrakstur kvöldsins.