Velvakandi

Lítil ferðasaga

VIÐ hjónin fórum í ferðalag fyrripartinn í júlí. Við fórum hringinn, gistum fyrst í Gerði í Suðursveit í mjög góðri gistingu, sem var í litlu húsi sem í eru tvö herbergi með sérinngangi í hvort herbergi og voru fín baðherbergi í báðum herbergjum.

Næst lá leið okkar til Eskifjarðar, þar gistum við á Mjóeyri, sem er alveg til fyrirmyndar.

Ég hringdi frá Gerði í ferðaþjónustuna Voga við Mývatn og þar var til eitt herbergi, en sturta og klósett voru sameiginleg með hinum herbergjunum. Verðið var 12.000 kr. nóttin. Ég hváði, því við vorum í þessari fínu gistingu með sérinngangi og baðherbergi fyrir 12.000 kr.

Svarið sem ég fékk var að líklega væri hærri „standard“ hjá þeim í Vogum. En bíðum nú, við komum að Vogum, fórum í gestamóttöku í skúr. Stúlka tók á móti okkur þar, og hvað haldið þið að blasi við okkur? Gámar. Við spurðum hvort við ættum að gista í gámi, og ég spurði hvort þetta væru gámar frá Kárahnjúkum. Svarið var nei, við fluttum þá inn. Þetta var nú allur hái „standardinn“ í Vogum við Mývatn, nokkrir gámar tengdir saman, hreinlætisaðstaða var ömurleg.

Vildi bara vekja athygli fólks á því hvað ferðaþjónustuaðilar leyfa sér að bjóða upp á á toppverði.

Ef og hefði

HÉR á landi er fjöldi fólks sem telur að evran geti bjargað okkur út úr efnahagsvandanum. Enginn hefur mér vitanlega fært rök fyrir þeirri skoðun.

Það segja mér Írar og Spánverjar, sem búa við yfir 18% atvinnuleysi, að gæfa okkar sé falin í okkar veika gjaldmiðli, krónunni.

Þeir segjast reyndar öfunda okkur af krónunni, því við fáum hátt verð fyrir útflutningsafurðir okkar og mikill fjöldi ferðamanna hér á landi sé sérstaklega öfundsverður.

Nú langar mig til að biðja Morgunblaðið, sem er svo hallt undir Evrópusambandið og afar sterkan gjaldmiðil þess, evruna, að vinna úttekt á stöðu þjóðarinnar ef við hefðum verið með evru í byrjun október sl. Annað eins hafa fræðimenn giskað á.

Er þetta týndur köttur?

ÞESSI köttur sást á flækingi í Skorradal, Skarðsheiðarmegin, helgina 8.-9. ágúst. Hann var ólarlaus og nokkuð styggur en sótti þó í félagsskap. Sakni hans einhver og vilji frekari upplýsingar um hann má hafa samband í netfangið rah14@hi.is.