Ljáðu mér orð heitir myndræn orðabók sem hugsuð er sem hjálpartæki til að auðvelda barni með annað móðurmál en íslensku að eiga samskipti við börn og fullorðna þegar það byrjar í leikskóla. Bókin er lokaverkefni þeirra Elísabetar V. Magnúsdóttur og Hildar Baldursdóttur úr Háskóla Íslands en Leikskólasvið Reykjavíkurborgar hefur nú undirritað samning um kaup á dreifingarrétti á verkefninu. Bókin er hugsuð þannig að teknar séu myndir af barninu við þær daglegu athafnir sem tilgreindar eru í bókinni. Myndirnar eru síðan settar inn í bókina og barnið þannig látið tengja orð við athafnir.
Efni bókarinnar er sett fram með myndrænum hætti en hana má nálgast á rafrænan hátt á vefsíðu Leikskólasviðs og á Fjölmenningarvefnum. Þar er hægt að vista orðabókina beint yfir á tölvu leikskólans og nýta hana síðan eftir þörfum. Orðabókinni fylgir upplýsandi greinargerð um mikilvægi móðurmáls, íslensku sem annars máls, og gildi slíkrar orðabókar fyrir málþroska barna. Tillaga um kaup Leikskólasviðs á orðabókinni kom frá hagræðingarhópi sem kom saman fyrr á árinu og tók meðal annars fyrir kostnað vegna fjölmenningarmála þar sem lagt var til að efni sem gæti nýst öllum leikskólum yrði keypt og gert aðgengilegt á vef Leikskólasviðs.
Til baka
Leita í greinasafni
Prenta grein
