„Hangikjötið farið og ísinn fer í úrslitaleiknum“

Eftir Skúla Unnar Sveinsson

skuli@mbl.is

„VIÐ lögðum upp með að byrja vel og síðan að halda einbeitingunni því maður vill auðvitað ekki lenda í einhverju veseni í leikjum þegar liðið hefur náð góðri forystu. Þetta gerðist samt í byrjun og þeir komust inn í leikinn á nýjan leik. En þetta er agi sem kemur kannski hjá þessum strákum eftir tíu ár,“ sagði Rúnar.

Eftir að FH gerði fyrsta mark leiksins komu sex í röð frá Akureyringum sem léku á als oddi og voru eldfljótir að refsa Hafnfirðingum fyrir hver mistök sem þeir gerðu, brunuðu upp í hraðaupphlaup og skoruðu.

„Strákarnir voru fínir. Við ætluðum að ná hangikjötinu af í dag og það er farið og svo fer ísinn af í úrslitaleiknum,“ sagði Rúnar léttur í lund eftir sigurinn í gær.

Heimir Örn er meiddur

Hann sagði úrslitaleikinn í kvöld leggjast vel í sig. „Haukar tóku okkur í kennslustund fyrir norðan fyrir mánuði og við verðum að gera betur í þessum leik.

Það er frábært að spila í þessu húsi og fyrir okkur sem komum svona langt að er frábært að fá tækifæri til að spila og það er hægt að gera þetta mót mjög flott,“ sagði Rúnar.

Akureyri var með undirtökin allan leikinn og þótt FH-ingar hafi náð að minnka muninn niður í eitt mark nokkrum sinnum í síðari hálfleik komust þeir ekki nær og sex mörk upp úr miðjum síðari hálfleik gerðu út um vonir FH um sigur.

„Ég held að strákarnir hafi ekki haft trú á þessu í byrjun en síðan þegar þeir föttuðu að þeir gætu þetta alveg þá sýndu þeir kjark og þor í fimmtíu mínútur. En það er erfitt að elta eftir svona slaka byrjun,“ sagði Einar Andri Einarsson, þjálfari FH, sem tefldi fram mjög ungu liði vegna talsvert mikilla meiðsla í hópnum. „Það er gaman að strákarnir fá tækifæri og við hefðum endilega viljað spila líka á morgun, en af því verður víst ekki,“ sagði þjálfarinn.