SKIPUÐ hefur verið ný stjórn Íslandsbanka. Samkvæmt heimildum Morgunblaðsins verður Jón Sigurðsson, fyrrverandi stjórnarformaður Fjármálaeftirlitsins, formaður stjórnar Íslandsbanka. Morgunblaðið hefur einnig fengið staðfest að í hópi stjórnarmanna verði nokkrir erlendir aðilar, en samkvæmt fréttum RÚV verða í stjórninni tveir Bandaríkjamenn, Norðmaður, Breti og þrír Íslendingar.
Gunnar Þ. Andersen, framkvæmdastjóri Fjármálaeftirlitsins, segir eftirlitið um þessar mundir vera að meta hæfi væntanlegra stjórnarmanna. „Málið er á síðustu metrunum,“ segir hann. Ekki liggi fyrir hversu langan tíma sú vinna taki, en heldur meiri vinna fari í að meta hæfi erlendra stjórnarmanna en Íslendinga.
Eignarhaldsfélag um nýja Íslandsbanka skipar stjórnarmennina. „Það er verið að gæta sjálfstæðis nýja bankans með þessu eignarformi,“ segir Gunnar.