,,Væri hroki að segja að ég hafi átt von á þessu“

Takist íslenska liðinu að komast í milliriðla getur Guðmundur skipt út tveimur leikmönnum og skipt einum út til viðbótar takist landsliðinu að komast alla leiki í undanúrslit.

Hinn 19 ára gamli Ólafur Guðmundsson úr FH var valinn í hópinn en þessi einn efnilegasti leikmaður landsins er eini nýliðinn í liðinu sem í eru 13 leikmenn sem unnu til silfurverðlauna á Ólympíuleikunum í Peking í ágúst í fyrra. Sigfús Sigurðsson er sá eini úr silfurliðinu sem ekki er í hópnum. Bjarni Fritzson var 15. maðurinn í ólympíuhópnum í Peking, var svokölluð varaskeifa, en hann er ekki í EM æfingahópnum hjá Guðmundi.

Ólafur hlaut náð fyrir augum landsliðsþjálfarans en leikmenn á borð við Sigurberg Sveinsson úr Haukum, Ragnar Óskarsson úr Dunkerque og Rúnar Kárason úr Füchse Berlin, sem allir voru í eldlínunni í undankeppninni, voru ekki valdir að þessu sinni.

Hrikalega ánægður og stoltur

,,Ég er hrikalega ánægður og stoltur og ég lít á þetta val sem mikla viðurkenningu. Það er draumur allra að vera valinn í landsliðið,“ sagði Ólafur Guðmundsson við Morgunblaðið í gær þegar leitað var eftir viðbrögðum hans um valið.

Spurður hvort hann hafi átt von á því að vera valinn sagði Ólafur: ,,Það væri mikill hroki að segja að ég hefði átt von á þessu. Landsliðið okkar hefur sjaldan verið jafn sterkt og mikið af mönnum úr að velja. Ég var í 18 manna æfingahóp fyrr í vetur og mér fannst ég standa mig ágætlega þar og ég hef staðið mig nokkuð vel í vetur. Þar af leiðandi fannst mér ég alveg vera inni í myndinni,“ sagði Ólafur.

Gummi sýnir mér mikið traust

,,Gummi sýnir mér mikið traust með að velja mig í hópinn. Hann kann greinilega að meta það sem ég hef gert. Ég lærði mikið af æfingunum sem ég tók þátt í með landsliðinu í vetur. Vissulega voru það mikil viðbrigði að æfa með landsliðinu í stað þess að æfa með FH. Gæðamunurinn var mikill en ég var fljótur að venjast því,“ sagði Ólafur. Eini leikur hans með landsliðinu var leikur gegn svokölluðu pressuliði í lok október en hann er ekki skráður sem landsleikur.

Ólafur segist mæta í toppstandi til æfinganna með landsliðinu en eins og áður segir verður fækkað um einn áður en endanlegur hópur verður valinn.

,,Ég mun leggja mig allan fram á æfingunum og gera mitt besta og svo verður bara að koma í ljós hverju það skilar manni. Ég er alveg búinn að jafna mig af meiðslunum í ökkla. Ég tók mér smá frí um jólin til að safna kröftum og verða hungraðri. Það er búið að vera mikið álag á mér í vetur en nú er ég alveg klár og mæti ferskur og heill heilsu til æfinganna,“ sagði Ólafur sem vann til silfurverðlauna á HM 19 ára landsliða í Túnis í sumar og var í mótslok valinn besti leikmaður mótsins.