Tíu nýliðar í hópnum

Eftir Víði Sigurðsson

vs@mbl.is

ÞAÐ eru allt leikmenn íslenskra félaga en til viðbótar verða á fyrstu æfingunum þær af landsliðskonunum sem spila erlendis, sem ekki verða farnar til sinna félagsliða á þeim tíma. Tíu nýliðar eru í þessum 25 manna hópi, þær Sonja B. Jóhannsdóttir, Eyrún Guðmundsdóttir og Soffía A. Gunnarsdóttir, ásamt sjö leikmönnum úr U19 ára landsliðinu, sem eru Berglind Björg Þorvaldsdóttir, Birna Berg Haraldsdóttir, Katrín Ásbjörnsdóttir, Mist Edvardsdóttir, Thelma Björk Einarsdóttir, Arna Sif Ásgrímsdóttir og Silvía Rán Sigurðardóttir.

Hólmfríður heima og Santos beðið um leyfi fyrir Þórunni

„Hólmfríður Magnúsdóttir mun líka æfa með okkur þar sem hún fer ekki til Bandaríkjanna fyrr en eftir Algarve-bikarinn, Edda Garðarsdóttir og Ólína G. Viðarsdóttir verða líklega á fyrstu æfingunum, og þá höfum við beðið Santos um leyfi fyrir Þórunni Helgu Jónsdóttur en við höfum ekki fengið svar við því ennþá,“ sagði Sigurður Ragnar við Morgunblaðið.

Til viðbótar eru erlendis þær Þóra B. Helgadóttir, Margrét Lára Viðarsdóttir, Guðrún Sóley Gunnarsdóttir, Guðný B. Óðinsdóttir, Guðbjörg Gunnarsdóttir, Erla Steina Arnardóttir og Dóra Stefánsdóttir.

Landsliðið leikur sex leiki í febrúar og mars, fjóra í Algarve-bikarnum og síðan mætir það Serbíu og Króatíu á útivelli í undankeppni heimsmeistaramótsins. Á Algarve er spilað gegn þremur af sterkustu þjóðum heims, Bandaríkjunum, Svíþjóð og Noregi, og svo við eitthvert fjórða lið um endanlegt sæti á mótinu.

Skoðum hvort um stórstígar framfarir er að ræða

„Ég verð með stærstan hluta hópsins helgina 9.-10. janúar en þegar við komum aftur saman tveimur vikum síðar verða flestar þeirra sem spila erlendis farnar. Við munum á þessum æfingum fara yfir okkar áherslur og skoðum hvort einhverjir leikmenn hafi tekið stórstígum framförum frá því í fyrra.

Síðan æfum við fyrstu helgina í febrúar og eftir það vel ég 20 manna hóp fyrir mótið. Hann kemur saman 20. febrúar og fer til Portúgals tveimur dögum síðar. Þær sem spila erlendis koma væntanlega beint til Algarve frá sínum félögum,“ sagði Sigurður.

Í góða æfingu fyrr en áður

„Okkar leikmenn þurfa að vera komnir í góða æfingu fyrr á þessu ári en nokkurn tíma fyrr. Bæði er Algarve-bikarinn mun fyrr en áður, byrjar 24. febrúar, og svo leikum við þessa þýðingarmiklu HM-leiki í lok mars,“ sagði Sigurður Ragnar Eyjólfsson.

Þegar liggur fyrir að landsliðið spilar tíu leiki á árinu 2010, þar af þessa sex í febrúar og mars sem áður eru nefndir. Til viðbótar eru síðan HM-leikir við Norður-Írland og Króatíu í júní og við Frakkland og Eistland í ágúst. Nái Ísland að vinna HM-riðilinn fer liðið í umspil síðar um haustið. Á árinu 2009 spilaði landsliðið 14 leiki sem er það mesta í sögu þess frá upphafi.