STÚLKAN frá Litháen sem talin er hafa verið flutt hingað nauðug til þess að stunda vændi er að sögn Kolbrúnar Sævarsdóttur, saksóknara, talin í hættu og nýtur sérstakrar verndar af þeim sökum. Vildi Kolbrún að öðru leyti ekki tjá sig um hagi stúlkunnar en hún er nítján ára gömul og segist hafa verið seld í vændi í heimalandi sínu. Mun hún bera vitni í málinu fari það fyrir dóm.
Kolbrún segir að ákvörðun um hvort gefin verði út ákæra í málinu verði tekin í dag en gæsluvarðhald yfir fimm Litháum sem taldir eru eiga hlut að málinu rennur út í dag. Auk mannanna fimm sem sitja í gæsluvarðhaldi er Íslendingur grunaður um aðild að málinu en hann var ekki hnepptur í gæsluvarðhald.
Málið barst saksóknara fyrir um fjórum vikum og hafði fram að því verið í rannsókn hjá lögreglunni á Suðurnesjum. Kom það til kasta hennar í október þegar stúlkan kom til landsins. skulias@mbl.is