Heimamenn verða að sjá um stuðið

„Mér fannst árið ekki mjög hressandi, sem er kannski ekki að marka því ég er gamall fauskur. Ég reyndi að vera á tánum varðandi erlenda músík, en þótt margt væri fínt – eins og plötur Micachu & The Shapes, The XX og Green Day í meginstraumsrokkinu – var ekkert sem beinlínis gerði útslagið. Á Íslandi komu Hjaltalín og Bloodgroup með frábærar plötur og margar mjög góðar komu að auki eins og Morðingjarnir, Hjálmar og Hank & Tank. Það er ágæt stemning í tónleikalífi og alltaf fullt af efnilegu dóti í gangi. Þegar engar erlendar stórstjörnur láta sjá sig verða heimamenn bara að sjá um stuðið. Útgáfubransinn breyttist mikið, Kimi og Borgin og fleiri komu inn á meðan Smekkleysa og 12 tónar nánast hurfu. Sena er svo enn að og mér fannst ánægjulegt að tónlistarbókaútgáfa þeirra fyrir jólin gekk vel.“