Villta vestrið í Evrópubandalaginu toppar kúrekasamfélag Ameríku

ALLT er breytingum undirorpið, nú er Evrópubandalagið búið að toppa kúreka vestursins í Bandaríkjunum. Þeir voru þekktir fyrir að taka af lífi einstaklinga sem voru misgóðir eða illir eftir atvikum. Ekki hefur þetta þótt vera til eftirbreytni en nú hefur Evrópubandalagið toppað kúrekana og stuðlar að því að heilar þjóðir séu teknar af lífi með fjárhagslegu kverkataki. Skúrkarnir sem EB ver í dag gagnvart Íslendingum eru Bretar og Hollendingar, á morgun? Nú ætlar Evrópubandalagið að freista þess að taka Íslendinga af lífi án dóms og laga vegna þess að EB þorir ekki að leggja ágreining þjóðanna í dóm. Þeir vita nefnilega upp á sig skömmina, vita að ein aðalástæðan fyrir ótrúlegu og gölnu flæði bankanna fram að bankahruni var vitlaust reglugerðarverk Evrópubandalagsins. Þeir vita einnig að hvergi er stafur fyrir því að Ísland eigi að bera á byrgð á einkarekstri hvorki í bönkum né öðru.

Icesave-samningar ríkisstjórnar Jóhönnu Sigurðardóttur eru skelfilegustu samningar í sögu íslenska lýðveldisins, nánast algjör þjónkun við Breta og Hollendinga í skjóli EB og algjörlega á þeirra forsendum. Ríkisstjórn Íslands ver ekki einu sinni íslenska dóms- og réttarkerfið, það er hundsað í samningunum eins og hundaæði.

Steingrímur J. Sigfússon fjármálaráðherra hefur sýnt aðdáunarverða takta í að láta Samfylkinguna moka yfir sig óhroðanum og hann hefur hrópað og hrópað að þeir samningar sem nú liggja fyrir hafi verið gerðir af ríkisstjórn sjálfstæðismanna og Samfylkingar. Þessi boðskapur er leikur með sannleikann. Fyrri ríkisstjórn gaf vilyrði fyrir því að ganga til samninga með skilyrðum og formerkjum um getu Íslands, svokölluðum Brussel-viðmiðunum og eitt er að vilja ganga til samninga en annað að semja. Í samningunum skeði klúðrið, misskilningur á misskilning ofan, reynsluleysi og undirlægjuháttur við útlendinga, þekkingarleysi í gerð fjölþjóðlegra samninga í anda forsætisráðherrans sem talar ekki útlensku.

Um þessa síbylju Steingríms Sigfússonar hefur Ingibjörg Sólrún Gísladóttir, fyrrverandi formaður Samfylkingarinnar og utanríkisráðherra á mesta umbrotatímanum, kveðið fastast að orði allra íslenskra ráðherra að meðtöldum Geir Haarde. Í bréfi sínu til utanríkismálanefndar Alþingis 18. des. sl. orðaði hún það svo að þaninn strengur stjórnvalda í Evrópu haustið 2008 hefði verið yfirspenntur vegna ótta við óróann á fjármálamörkuðum, ótta við það að gert yrði áhlaup á evrópska banka vegna mistakanna í reglugerðarverkinu. Þess vegna eru þeir tilbúnir að fella litla þjóð sem hefur ekki sömu stöðu og stórveldin til þess að rétta vitleysuna af.

Um þessa „ábyrgð“ sagði Ingibjörg Sólrún: „Rétt er hins vegar að taka fram að þó að hin sameiginlegu viðmið feli í sér pólitíska skuldbindingu þá skuldbinda þau Ísland ekki með neinum hætti að þjóðarrétti ef ný stjórnvöld vilja hafa þau að engu.“ Þetta eru ummæli leiðtoga sem þorir. Í stað þess að standa einmitt fast á þessu lúffar ríkisstjórn Jóhönnu Sigurðardóttur í einu og öllu svo með ólíkindum er og fjármálaráðherra talar fjálglega sem málsvari Breta og Hollendinga en ekki síns fólks. Maður gæti haldið að Steingrímur Sigfússon væri orðinn háður því að engjast og þjást eftir áratuga stjórnarandstöðu og svo bíður hann upp á það í nafni aðstoðarmanns síns að dusta rykið af gömlum hagfræðikenningum frá tíð Sovétríkjanna og gera tilraunir á Íslendingum. Er nema von að landsmenn guði sig í bak og fyrir. Icesave-samningurinn er gjörsamlega óbrúklegur og stórhættulegur sjálfstæði Íslands og eðlilegum möguleikum til uppbyggingar. Minnumst þess:

* að Íslendingum ber engin skylda til þess að greiða samkvæmt kröfum Breta og Hollendinga.

* að krafan um ríkisábyrgð er einsdæmi í samningum Evrópuþjóða.

* að menn vita ekki einu sinni hvað Icesave-samningurinn þýðir í peningum.

* að Íslendingar eiga ekki að láta bjóða sér að íslensk lög séu hundsuð.

* að Íslendingar eiga ekki að láta bjóða sér að Bretar og Hollendingar neiti dómstólaleið.

* að Íslendingar eiga ekki að láta bjóða sér að dómar sem kunni að falla um samsvarandi mál geti ekki komið Íslendingum til góða.

* að Íslendingar eiga ekki að láta villta vestrið í EB ráða aftökuaðför að Íslendingum án dóms og laga.

* að Íslendingar eiga að hafna yfirskuldsetningu lítils Evrópulands með kverkataki EB.

* að valdhroki Evrópubandalagsins gagnvart Íslendingum er með ólíkindum.

* að Evrópubandalagið vill gleypa Ísland með húð og hári, flaka sjálfstæði Íslands með því að gera Ísland að efnahagslegri nýlendu Breta og Hollendinga og ná yfirtökum á auðlindum Íslands.

* að ef þessi skelfilegi Icesave-samningur verður samþykktur af Alþingi mun ómældur tími með óvissu og meiri óvissu fara í það að fá samninginn ógiltan á næstu misserum og árum, því samningurinn er ekki brúklegur fyrir Ísland. Hann er höggstokkur.