GESTIR þáttarins Orð skulu standa í dag eru Jóhann Alfreð Kristinsson laganemi og Vilborg Davíðsdóttir rithöfundur. Þau fást m.a. við „monsaralegur“ og „hasla sér völl“.
Fyrriparturinn er svona:
Nú er úti frost og fönn
fimbulvetur ríkir.
Um áramótahelgina var fyrriparturinn þjófstolinn:
Nú árið er liðið í aldanna skaut
og aldrei það kemur til baka.
Í þættinum botnaði Bragi Valdimar Skúlason:
Langlundargeðið að lokum svo þraut
því linnulaust skíturinn yfir það flaut,
þótt ekkert það ynni til saka.
Davíð Þór Jónsson vitnaði í vísindamenn sem segja alheiminn ekki einu sinni kominn á miðjan aldur:
En það ætti ekki að valda þér angist né þraut,
því enn er af nógu að taka.
Guðmundur Pálsson:
Á bátsskrifli leku í burtu það flaut
með blótsyrði á vörum og volæðistaut,
fegið hratt frá þessum klaka.
Úr hópi hlustenda botnaði Þorkell Skúlason í Kópavogi:
Það grætur víst enginn þau örlög það hlaut
sem urðu þess valdandi að allt fór í graut,
en svei því í ljósfælinn Laka.
Tómas Tómasson:
Skuldirnar hverfa nú bráðum á braut
bökuð þá aftur mun kaka.
Hlustendur geta sent botna og tillögur að fyrripörtum í ord@ruv.is eða til Orð skulu standa, Ríkisútvarpinu, Efstaleiti 1, 150 Reykjavík.
Til baka
Leita í greinasafni
Prenta grein
