Jón Ingvar Jónsson veltir fyrir sér dómstólaleiðinni í Icesave-málinu, sem gæti falist í því að Bretar og Hollendingar höfðuðu mál gegn innstæðutryggingasjóði fyrir íslenskum dómstólum. Hann yrkir:
Að aukast muni okkar sæmd
eru talsvert miklar líkur
verði hennar hátign dæmd
í Héraðsdómi Reykjavíkur.
Konráð Erlendsson bætir við:
Óbilgirni Englendinga
er alveg skýr
og höfðingsskapur Hollendinga
heldur rýr.
Stefán Vilhjálmsson er í öðrum hugleiðingum fyrir norðan:
Bleikur roði bólstrum á,
bjarma skarta fjöllin há,
dagsins boða dýrðir má,
drullusmart er út að sjá!
Nafn séra Hjálmars Jónssonar datt út við birtingu limru um það, er Ólafur G. Einarsson var gerður að heiðursborgara:
Útnefndur ungur til valda,
Ólafi rétt var að tjalda.
Garðabæ hefur
sá heiðraði refur
stjórnað frá örófi alda.
Són, 7. heftir tímaritsins um óðfræði, er komið út. Þar má finna ljóð Hólmfríðar Bjartmarsdóttur um vorið:
Lifandi er skógurinn að laufga sig á ný.
Látlaus streyma skýin yfir tindinn.
Lifandi er vatnið og leikurinn í því
og léttar dansa starirnar við vindinn.