Prúð Ekkert bendir til þess að nemendurnir á myndinni valdi kennurum sínum miklum erfiðleikum. En foreldarnir gætu verið úr óskammfeilnu fylkingunni sem fjölmiðlar í Japan hafa gefið heitið Hryllingsforeldrar.
Prúð Ekkert bendir til þess að nemendurnir á myndinni valdi kennurum sínum miklum erfiðleikum. En foreldarnir gætu verið úr óskammfeilnu fylkingunni sem fjölmiðlar í Japan hafa gefið heitið Hryllingsforeldrar.
[ Smellið til að sjá stærri mynd ]
Svo lítið er um börn í Japan að foreldrarnir, sem mega velja milli grunnskóla, ganga á lagið og gera ýmsar fáránlegar kröfur til kennara og skólastjórnenda.

Eftir Kristján Jónsson

kjon@mbl.is

MÓÐIRIN sagði að strákurinn hennar hefði brotið rúðuna í skólanum vegna þess að steinn hefði verið á stað þar sem ekki ætti að vera neinn steinn. Hún krafðist líka miskabóta vegna launataps er hún varð fyrir þegar henni var gert að mæta á staðinn vegna rúðubrotsins. Önnur krafðist þess að árbók skólans yrði endurgerð vegna þess að barnið hennar sást ekki á nógu mörgum myndum í bókinni.

Foreldrar nemenda í japönskum grunn- og leikskólum eru margir hverjir svo kröfuharðir í garð kennaranna að hinir síðarnefndu eru á barmi taugaáfalls, sumir hafa fyrirfarið sér. Skýrt hefur verið frá því að fjarvistir kennara vegna andlegs álags hafi þrefaldast á einum áratug. Um 63% af öllum veikindadögum kennara eru vegna slíkra erfiðleika, segir í grein AFP -fréttastofunnar.

Naoki Ogi, sem gagnrýnt hefur skipulag skólakerfisins, hefur með aðstoð kennara safnað um 700 dæmum um framferði hinna svonefndu Hryllingsforeldra, eins og fjölmiðlar landsins kalla fyrirbærið. Lýsingarnar minna stundum á fjarstæðuleikrit; eitt foreldrið heimtar að kennarinn sæki barnið á morgnana, annað krefst þess að kennarinn klippi neglurnar á barninu og það þriðja að kennarinn kanni veðurspána og segi nemendum hvort þeir þurfi að taka með sér regnhlíf daginn eftir.

Kröfur eru uppi um að útbúinn sé morgunverður á leikskólum handa foreldrum sem koma með börnin og íþróttaföt barnanna séu þvegin í skólanum. „Móðir hringir í okkur klukkan hálfátta að morgni og nöldrar stanslaust í tvær klukkustundir... Einn morguninn spurði hún: Af hverju léstu barnið mitt tala á undan öllum hinum börnunum? Barninu mínu finnst ekki gott að flytja ræðu.“

Borgarstjórinn í Tókýó hyggst nú senda um 60.000 grunnskólakennurum handbók með ráðleggingum varðandi rétt viðbrögð þegar fást þarf við hryllingsforeldra. Þessi varnaraðgerð borgarinnar mun kosta um 10 milljón jen eða sem svarar rösklega 14 milljónum króna.

Kennurunum er ráðlagt að hlusta kurteislega á kvartanir og sýna samúð án þess að segja ávallt að kvörtunin eigi rétt á sér. Sérfræðingar í menntamálum segja að oft séu umræddir foreldrar fólk sem lifi einangruðu lífi og ráðfæri sig við fáa um barnauppeldi. Kvartanaflóð geti líka verið aðferð foreldra sem þjáist af streitu og þurfi að fá útrás einhvers staðar.

Neytandinn er Guð

En af hverju er þessi staða komin upp í Japan, þessari háborg siðfágunar? Viðkoman er einhver sú minnsta í heimi og skólarnir keppa ákaft um nemendur. Árið 2000 var gerð sú breyting að foreldrum var leyft að velja skóla en áður urðu börnin einfaldlega að fara í þann skóla sem næstur var. Foreldrarnir geta nú valið og hafnað. Bent er á að þetta ýti undir að skólarnir sinni öllum duttlungum þeirra til að halda börnunum.