GRÆNA ljósið hélt opnunarteiti Bíódaga í fyrrakvöld í Regnboganum og bauð í fjórfalt óvissubíó, gestir vissu ekkert hvaða mynd væri sýnd. Í einum af smærri sölunum sem 35 gestir geta setið í var sýnd býsna merkileg kvikmynd, Trash Humpers , sem þýða mætti með orðinu Ruslagámariðlar , en hún fjallar um „gamalt fólk sem riðlast á ruslagámum“, eins og það er orðað á vef Græna ljóssins. Reyndar eru ungir leikarar í aðalhlutverkum með grímur sem líkjast gömlu fólki. Leikstjóri myndarinnar, Harmony Korine, skrifaði einnig handritið að þessari vægast sagt óvenjulegu mynd.
Þegar bíógestir áttuðu sig á því hvaða mynd væri verið að sýna gengu þeir nær allir út og aðeins einn gestur horfði á myndina til enda, Sædís Kolbrún Steinsdóttir.
„Þetta var áhugaverð mynd, hún er náttúrlega frekar viðbjóðsleg en ég sé alveg snilldina í þessu,“ segir Sædís. Hún segist hafa átt í löngum samræðum við fólk um myndina að sýningu lokinni og í gær einnig.
-Þá hefur hún skilið eitthvað eftir sig, ekki satt?
„Jú, mér finnst það.“
Sædís segir myndina leikna en henni hafi þó sýnst að sumir sem fram í henni koma séu rauverulegir „trash humpers“, eða ruslagámariðlar. Þrír leikarar séu í aðalhlutverkum en inni á milli skjóti ýmsar persónur upp kollinum. Hún segir myndina snilldarverk, viðbjóðslega en á sama tíma drepfyndna. Leikstjóri hennar hafi gert frábærar kvikmyndir í gegnum tíðina og sýn hans fari yfir mörg strik en veki samt sem áður athygli og umtal.
-Ef þú ættir að gefa henni stjörnur, hvað væru þær margar?
„Ég myndi gefa henni þrjár og hálfa af fimm mögulegum,“ svarar Sædís. helgisnaer@mbl.is
Til baka
Leita í greinasafni
Prenta grein
