Eftir Þórð Gunnarsson
thg@mbl.is
AÐKOMA einkaaðila að fjárfestingum í jarðhitaorkuframleiðslu er nauðsynleg, svo hægt sé að ráðast í þau verkefni sem fyrirhuguð eru fram til ársins 2017. Þetta er mat sérfræðinga Íslandsbanka í jarðhitaorku. Bankinn birti í gær skýrslu þar sem fjárþörf fyrir verkefnin sem um ræðir er metin. Svonefnt orkuteymi Íslandsbanka áætlar þannig fjárþörfina fyrir nauðsynlegar fjárfestingar ríflega 2,3 milljarða dollara íslenskum krónum eru það yfir 300 milljarðar. Eiginfjárhlutfall fjárfestinga þarf að vera tæplega 40% og nema 840 milljónum dollara.
Baklandið veikara en áður
Árni Magnússon, sem fer fyrir orkuteymi Íslandsbanka, sagði á kynningu bankans í gær að einsýnt væri að einkaaðilar þyrftu að koma að fjármögnun jarðhitaverkefna. Hingað til hefðu opinberir aðilar einir séð um fjármögnun jarðhitavirkjana. Nú væri hins vegar þrengra í búi hjá hinu opinbera, og því þyrfti að grípa til annarra ráða. Árni nefndi afstöðu stjórnvalda í því samhengi, en hún hefur ekki alltaf verið jákvæð. Í skýrslu Íslandsbanka kemur fram að erlendir fjárfestar hafi áhyggjur af viðhorfi stjórnvalda gagnvart fjárfestingum útlendinga í nýtingu náttúruauðlinda. Hin skýru skil sem dregin voru á milli eignarhalds og nýtingarréttar við kaup erlends aðila á HS Orku hafi hins vegar opnað á nýja möguleika.