Brids - Guðmundur S. Hermannsson | ritstjorn@mbl.is

Sexan hefði nægt

Áfram er haldið að glugga í bridsmetabók Davids Birds og Nikos Sarantakos. Mörg dæmi eru um það þegar spilarar spila undan háspilaröð í slemmu í þeirri von að koma makker inn og fá stungu í hliðarlit til baka. En þetta spil er talið vera versta dæmið um sofandahátt sagnhafa.

Spilið kom fyrir í landskeppni Norður-Ameríku árið 1985 milli Kanada og Bermúda. Suður opnaði á 1♣, Kanadamaðurinn Subbash Gupta stökk í 5♣, sem sýndi tígul, norður doblaði og suður sagði 6♣ sem varð lokasamningurinn.

Gupta ákvað að spila út ♦4 í þeirri von að austur gæti tekið slaginn og spilað hjarta til baka. Sagnhafa þótti útspilið ekkert grunsamlegt og bað um lítið í borði. Drew Channell í austur fékk því slaginn á ♦5 og vissi til hvers var ætlast af honum.