Bankaráðsmenn skýri umræðu um launahækkun

Birkir Jón Jónsson, varaformaður Framsóknarflokksins, lagði fram þá tillögu á fundi efnahags- og skattanefndar í gærmorgun að Lára V. Júlíusdóttir, formaður bankaráðs Seðlabankans og Ragnar Árnason, komi á fund nefndarinnar hið fyrsta og geri grein fyrir hvernig málum var háttað í umræðum um launahækkun seðlabankastjóra.

„Málefni er lúta að Seðlabanka Íslands heyra undir efnahags- og skattanefnd og í ljósi umræðna á Alþingi finnst mér einfaldlega þörf að kalla hið rétta fram í málinu þar sem orð bankaráðsmanna í Seðlabankanum hafa verið misvísandi gagnvart því sem ýmsir stjórnmálamenn hafa síðan haldið fram,“ segir Birkir.

Trúverðugleiki bankans

Birkir býst ekki við öðru en að málið verði tekið fyrir í nefndinni á næstunni. „Það mótmælti þessu enginn og ég get í raun ekki séð hvernig menn ættu að færa rök fyrir því að við komum þessu máli ekki á hreint því það hefur verið kallað eftir því af hálfu þingmanna flestra flokka. Enda erum við að tala um grundvallarstofnun í samfélaginu og upp á trúverðugleika bankans er mikilvægt að mál sem þessi séu til lykta leidd og endurtaki sig ekki.“