Frambjóðandi á vegum Dags Eggertssonar kippti teppinu undan Steinunni Valdísi flokkssystur hans. Leikritið var sett þannig upp að segði hún ekki þegar af sér yrði henni kennt persónulega um ófarir Dags. Það réð borgarstjórinn fyrrverandi ekki við. Afsagnarástæðan var meðal annars sú að hún hefði hlotið eitthvað hærri fúlgur en Dagur í prófkjöri sem bæði tóku þátt í árið 2006.
En Jóhanna og Dagur höfðu áður vísað öllum umkvörtunum um siðleysi Samfylkingarmanna til sérstakrar umbótanefndar sem skyldi rannsaka styrkjamálið og velta við hverjum steini. Rannsóknin átti þó að takmarkast við styrki frá og með árinu 2007. En frá þeim tíma hafa ekki farið fram nein prófkjör fyrr en nú í ár. Snjallt.
Samfylkingin á enn eftir að skipa sérstaka umbótanefnd til að rannsaka hegðun og umgengni í miðbænum á nóttunni, en undirbúningur þess máls er sem betur fer vel á veg kominn.
Til að einfalda málið hefur þegar verið ákveðið að rannsaka umgengni og hegðun í miðbænum á milli kl 3 og 6 á daginn, sem er bæði aðgengilegra en á nóttunni og talið gefa jafngóða mynd af ástandinu.
Mun sama nefnd og rannsakar styrkina sjá um þessa rannsókn og getur þá borið umgengnina saman við þá styrki sem safnað var á árunum 2007–2009 þegar engin prófkjör fóru fram og eru talin gefa góða mynd af sukkárunum.
Velta skal hverjum steini. Staksteinar ætla að velta með.
Til baka
Leita í greinasafni
Prenta grein
