Kreppan bitnar á körlum

Bjarni Ólafsson

bjarni@mbl.is

Atvinnutap frá því að kreppan hófst hér á landi hefur ekki skipst jafnt á milli kynjanna. Karlar standa höllum fæti í samanburði við konur þegar allir þættir atvinnuþróunar síðustu tveggja ára eru skoðaðir, að hlutastörfum undanskildum.

Störf á öðrum ársfjórðungi 2010 voru 2.000 fleiri en á sama tíma í fyrra, en öll aukningin varð meðal kvenna. Nettóbreyting á störfum karla var engin. Körlum í fullu starfi fækkaði um 200 á milli ára á meðan körlum í hlutastarfi fjölgaði um 200. Á sama tíma fjölgaði konum í fullu starfi um 1.300 og konum í hlutastarfi um 700.

Þegar staðan nú er borin saman við annan ársfjórðung 2008 er myndin enn dekkri fyrir karlmenn. Á tveimur árum fækkaði körlum í starfi um 11,2 prósent. Þar af fækkaði körlum í fullu starfi um 14,7 prósent en stöðugildum karlmanna fækkaði um 12,8 prósent.

Störfum kvenna fækkaði um 1,0 prósent frá öðrum fjórðungi 2008. Konum í fullu starfi hefur fækkað um 3,1 prósent en stöðugildum hefur fækkað um 1,3 prósent.

Mælt atvinnuleysi karla mældist á öðrum fjórðungi þessa árs 9,4 prósent en hjá konum 8,0 prósent. Hafa ber hins vegar í huga að körlum á vinnumarkaði hefur fækkað um 5.300 en konum á vinnumarkaði hefur fjölgað um 2.900 frá öðrum fjórðungi 2008. Hefur það áhrif á prósentutöluna.