Íslenskur karlmaður var handtekinn sl. miðvikudagskvöld fyrir að smygla hassi til Færeyja. Maðurinn, sem er 26 ára gamall, var handtekinn á flugvellinum í Vágur við komuna til eyjanna vegna gruns um að vera með fíkniefni innvortis. Hann var í kjölfarið fluttur á Landssjúkrahúsið í Þórshöfn þar sem efnin fundust við leit.
Í gæsluvarðhaldi
Játning liggur fyrir af hálfu mannsins um fíkniefnasmygl og að efnin hafi ekki öll verið ætluð til einkanota. Samtals fundust í honum 316 grömm af hassi í 101 pakkningu. Maðurinn hafði klippt fingurna framan af gúmmíhönskum og fyllt þá af hassi og lokað fyrir. Hann gleypti nokkrar af pakkningunum en stakk afganginum af þeim upp í endaþarminn á sér að því er fram kemur í frétt færeyska ríkisútvarpsins.Manninum var haldið á sjúkrahúsinu fram á laugardag þegar hann hafði skilað öllum pakkningunum af sér. Þá var hann fluttur í gæsluvarðhald og mun sitja í því fram til 26. júlí. Hann hefur verið ákærður fyrir að hafa ætlað að selja hassið í Færeyjum. hjorturjg@mbl.is