Brids - Guðmundur Páll Arnarson | ritstjorn@mbl.is

Víxlun víra.

Með hliðsjón af samlegunni í spaða er þetta undarlegur samningur, en vírarnir víxluðust eitthvað í höfðinu á Steve Beatty, sem hélt á spilum norðurs. Makker hans, George Jacobs, sagði 2G yfir opnun austurs á 2♥ og Beatty hækkaði einfaldlega í þrjú. Annað eins hefur svo sem gerst, jafnvel í landsliðskeppni Bandaríkjamanna.

Út kom hjarta og Jacobs dúkkaði fyrsta slaginn, drap svo á ♥Á og lét ♠D rúlla hringinn. Vestur lagði næst kónginn á ♠G og legan sannaðist. Jacobs spilaði þá ♦G, en austur varðist vel með því að fara upp með ♦D og stífla litinn. Jacobs drap og hugsaði málið. Sá svo fallega lausn.

Hann spilaði tígli á tíuna, tók ♠10 og sendi vestur inn á hæsta spaða. Vestur varð að spila frá ♣K og hleypa sagnhafa heim á frítíglana.