Velvakandi

Týnd myndavél

Myndavél, Samsung, bleik að lit, tapaðist í miðbæ Reykjavíkur um helgina, líklega á skemmtistaðnum Zimsen. Fundarlaun, s.868-4870eða 657-6521.

Styður biskup

Ég ber fullt traust til biskupsins og vil ekki að hann fari frá. Mér finnst hann hafa staðið sig vel í erfiðu og ekki öfundsverðu starfi. Hefnigjarnir og langræknir prestir finni sér annað starf.

Léleg þjónusta

Ég finn mig tilknúna að skrifa um lélega þjónustu hjá saumastofunni Listasaumur á þriðju hæð Kringlunnar. Fyrir u.p.b. hálfum mánuði fór ég þangað með föt, sem átti að stytta. Ég var spurð hvort ekki væri nóg að hafa fötin tilbúin 6. september. Allt í lagi með það, en þegar ég mætti um hádegið þann 6. segir afgreiðslustúlkan að ég hefði átt að taka fram klukkan hvað ég hefði ætlað mér að koma, því það væri svo mikið að gera og fötin ekki tilbúin. Hún sagði að ég gæti komið og sótt þau eftir kl. 16 sama dag. Ég kom hins vegar um hádegið daginn eftir og viti menn, þá var ekki byrjað að eiga við fötin mín, sem þó áttu að vera tilbúin kl. 16 daginn áður. Afgreiðslustúlkan bauð mér að koma aftur eftir tvær klukkustundir og yrði það þá í þriðja sinn sem ég kæmi til að ná í fötin. Ég var alveg búin að fá mig fullsadda af þessari „afgreiðslu“ á þessari saumastofu, og tók fötin aftur og fór með þau á klæðskerastofu á Seltjarnarnesi. Þar var mér sagt að fötin yrðu tilbúin eftir tvo daga, ekkert mál. Ég kem aldrei aftur til með að eiga viðskipti við saumastofuna í Kringlunni, og beini héðan í frá viðskiptum mínum til klæðskerastofunnar á Seltjarnarnesi.