Bjarni Ólafsson
bjarni@mbl.is
Írska ríkisstjórnin greindi frá því í gær að hún muni leggja hinum illa stadda banka Anglo Irish Bank til fimm milljarða evra til viðbótar þeim 25 milljörðum sem þegar hafa farið í bankann.
Írska ríkið á í afar erfiðum vanda um þessar mundir, en halli ríkissjóðs er nú um 12 prósent af vergri landsframleiðslu og gæti að sumra mati farið í 25 prósent þegar kostnaður við björgun bankakerfisins er tekinn með.
Til að skelfa ekki kaupendur ríkisskuldabréfa um of þarf ríkið að ná tökum á hallanum, en ávöxtunarkrafa á tíu ára írsk ríkisskuldabréf nálgaðist í gær sjö prósent, sem er 4,7 prósentustigum meira en þýska ríkið þarf að sætta sig við. Er krafan nú sambærileg við þá sem var á grískum bréfum mánuði áður en gríska ríkið þurfti að leita til ESB um aðstoð.
Á hinn bóginn eru írsk stjórnvöld treg til að krefja lánardrottna Anglo Irish um að taka á sig frekara tap af ótta við að það muni koma niður á öðrum írskum bönkum, sem nú þegar eiga afar erfitt með aðgengi að fjármagni.
Þrátt fyrir afar erfiða stöðu gera ekki allir ráð fyrir því að Írland stefni í sambærilega fjármögnunarerfiðleika og þá sem Grikkland þurfti að kljást við. Írland hafi nú þegar fjármagnað rekstur ríkissjóðs út fyrri helming næsta árs og engir stórir gjalddagar eru á næsta leiti. Þá eigi ríkið um 20 milljarða evra í lausu fé.
Fari svo að kostnaðurinn við björgun bankakerfisins reynist minni en nú er gert ráð fyrir ætti ávöxtunarkrafan á írsk ríkisskuldabréf að lækka.
Svartsýnni spámenn benda hins vegar á að landsframleiðsla Írlands hafi á öðrum ársfjórðungi skroppið saman um fimm prósent á ársgrundvelli og því gætu skatttekjur ríkisins minnkað og kostnaður við björgun bankanna aukist.