Á Celtic Manor-golfsvæðinu í New Port í Suður-Wales eru þrír 18 holu keppnisvellir í hæsta gæðaflokki. The Twenty Ten-golfvöllurinn var opnaður í júlí fyrir þremur árum og er hann fyrsti golfvöllurinn sem er hannaður frá upphafi fyrir Ryder-keppnina.
Ross McMurray, golfvallahönnuður hjá European Golf Design-fyrirtækinu, hafði umsjón með verkinu sem tók alls átta ár. Gríðarlegar framkvæmdir voru á vellinum á árunum 2005-2006. Milljón rúmmetrum af mold var ýtt til hliðar og fluttir á milli staðar við framkvæmdina á The Twenty Ten-vellinum. Byggður var til helminga alveg nýr völlur frá grunni en einnig var Wentwood Hills-vellinum breytt og hann felldur inn í nýja völlinn. Robert Trent Jones jr. hannaði þann völl.
Hannaður með áhorfendur í huga
Ryder-keppnin er þriðji stærsti íþróttaviðburður heims í sjónvarpi. Aðeins heimsmeistarakeppnin í fótbolta og sumarólympíuleikarnir eru með meira áhorf. Áhorfendur láta sig ekki vanta á keppnina og er gert ráð fyrir að 50.000 áhorfendur mæti á hverjum degi alla þrjá keppnisdagana. Völlurinn er hannaður með áhorfendur í huga og geta þeir fylgst með úr háum brekkum til hliðar við brautirnar og völlurinn er hannaður með það í huga að tugþúsundir áhorfenda geti flutt sig auðveldlega á milli staða á lokaholunum þar sem spennan verður í hámarki.Völlurinn er 6.852 metrar af keppnisteigum, par 71, en til samanburðar er Grafarholtsvöllur 6.026 metrar að lengd af öftustu teigum.
Vatn og vatnshindranir koma við sögu á helmingi brauta The Twenty Ten-vallarins, og getur því margt farið úrskeiðis í harðri holukeppni Evrópuliðsins gegn Bandaríkjamönnum. Margar brautir vallarins eru hannaðar með það að markmiði að bjóða kylfingunum upp á ýmsa möguleika í upphafshöggunum. Sóknarleikur getur borgað sig á vissum brautum og á öðrum er betra að spila af öryggi.
Lokaholurnar þrjár, 16., 17. og 18., eru í lægsta hluta dalsins og þar munu úrslitin ráðast í flestum leikjum keppninnar. Sextánda brautin er 456 metra löng par 4-hola, sem er ekkert smáræði. Sú næsta er 182 metra löng par 3, og þar þarf alvöru verkfæri til þess að koma boltanum á flötina. Lokaholan er par 5, og 525 metra löng. Þar er vatn fyrir framan flötina og aðeins fullkomið innáhögg með brautartré eða blending getur komið boltanum inn á flötina í tveimur höggum. Þeir sem ákveða að leggja „upp“ í öðru högginu eiga eftir erfitt vipp úr niðurhalla inn á flötina, sem stendur hátt yfir brautinni.
seth@mbl.is