Vindaloo er að finna á matseðli flestra indverskra veitingahúsa en rétturinn kemur upprunalega frá Goa á vesturströnd Indlands.

Vindaloo er að finna á matseðli flestra indverskra veitingahúsa en rétturinn kemur upprunalega frá Goa á vesturströnd Indlands. Þar er töluvert um portúgölsk áhrif og er talið að nafnið megi rekja til Carne de vinha d'alhos, en uppistaðan í þeim rétti er svínakjöt, hvítlaukur og vínedik. Bætið við fullt af indversku kryddi og útkoman er Vindaloo. Þetta er nokkuð kryddaður réttur en hægt er að stjórna því með því að minnka eða auka magn chilipiparsins.

1 kg svínahnakki

1 laukur, saxaður

2 tsk kóríanderfræ

2 tsk kummínfræ

5 kardemommur, einungis fræin innan úr belgjunum

5 negulnaglar

1 kanilstöng

10 hvítlauksgeirar

3 cm engiferrót, flysjuð og rifin

3-5 rauðir chilipiparbelgir (þeir eru mildari ef þið fræhreinsið þá)

3 msk vínedik

2 dl cashewhnetur

10 svört piparkorn

Malið kanilstöng, kóríanderfræ, kummínfræ, piparkorn og negulnagla í morteli eða kaffikvörn.

Skerið kjötið í teninga. Maukið engifer, hvítlauk, chilipipar og vínedik saman í matvinnsluvél. Bætið kryddblöndunni saman við. Blandið maukinu saman við kjötbitana og leyfið að marinerast í eina eða tvær klukkustundir. Hitið olíu á pönnu. Setjið laukinn á pönnuna og steikið þar til hann er orðinn mjúkur eða í um þrjár mínútur. Bætið kjötinu út á pönnuna og steikið í fimm til sex mínútur eða þar til allir bitarnir hafa tekið á sig gylltan lit.

Setjið lok á pönnuna og lækkið hitann. Leyfið kjötinu að malla á pönnunni á mjög vægum hita í um 40 mínútur. Bætið örlítilli skvettu af vatni við ef þarf. Hitið olíu á annarri pönnu og steikið cashewhneturnar þar til þær eru orðnar gylltar.

Berið kjötið fram með hrísgrjónum, cashwhnetunum, naan-brauði og raita-jógúrtsósu.

Steingrímur Sigurgeirsson

Fleiri uppskriftir má finna á Matur og vín-vef Morgunblaðsins: mbl.is/matur og á vinotek.is.