Á Akureyri togast menn á um staðsetningu hjúkrunarheimilis. Hjálmar Freysteinsson taldi sér málið skylt og kvað í sumar:
Fast þótt elli að mér sverfi
auðmjúklega þess ég bið
að forsjónin mér leggi lið
svo lendi ég ekki í Naustahverfi.
En nú hefur veður skipast í lofti, að sögn Hjálmars:
Hausinn þarf að höggva af mér
og hóta fári stríðu,
að öðrum kosti aldrei fer
út í Vestursíðu.
Og tekur hann fram, að það sé bót í máli, að enn sé hann þokkalega ern. Björn Ingólfsson telur málið leyst:
Hlutskipti sér karlinn kaus
kunnur af geði stríðu:
Hjálmar verður höfuðlaus
hafður í Vestursíðu.
Þá Friðrik Steingrímsson:
Oft þó brúki elli raus
sem alla virðist kvelja,
á meðan karlinn heldur haus
heima fær að dvelja.
Hallmundur Kristinsson lagði orð í belg:
Ljóst er að þakka má lækninum störf,
lúnum – af erfiði hoknum,
en þá verður Hjálmari hjúkrunar þörf
þegar hausinn er farinn af skrokknum.
Jóni Arnljótssyni leist ekki á:
Illa þetta að mér sló.
Inn með þennan sóða,
sem í gærdag hausinn hjó
af Hjálmarinum góða.
Pétur Blöndal pebl@mbl.is