„Hver einasti íslenski keppandi stendur sig betur en skákstigin gera ráð fyrir og við erum mjög stolt af þeim,“ segir Gunnar Björnsson, forseti Skáksambands Íslands, um árangur Íslendinga á Ólympíumótinu í skák sem nú stendur yfir í Rússlandi. Karlaliðið er nú í 37. sæti á mótinu en var í 54. sæti skákstigalistans. Kvennaliðið stendur sig enn betur en það eru í 38. sæti en var í 69. sæti stigalistans.
Í gær vann karlasveitin sigur á Perúmönnum með þremur og hálfum vinningi gegn hálfum í opnum flokki í áttundu umferð mótsins. Að sögn Gunnars eru Perúmennirnir sterkari á blaði en Íslendingar og lukkan hafi fylgt íslenska liðinu.
Lenka með sex sigra í röð
Í kvennaflokki gerðu Íslendingar jafntefli við Ítala, 2:2, en þær ítölsku voru mun hærra skrifaðar fyrirfram.„Ég vil sérstaklega benda á árangur Lenku Ptácníková sem er búin að fá 6 ½ vinning. Hún tapaði í fyrstu umferð, vann svo sex skákir í röð og gerði jafntefli í gær,“ segir Gunnar.
Í næstu umferð, þeirri tíundu, mætir karlaliðið Chile sem Gunnar segir að sé af svipuðum styrkleika og íslenska liðið. Stelpurnar mæta Mongólum sem eru töluvert stigahærri. Alls eru tefldar ellefu umferðir á mótinu. kjartan@mbl.is
»Allir íslensku karlarnir unnu sínar skákir á móti Perú fyrir utan Björn Þorfinnsson sem gerði jafntefli.
»Gegn Ítölum vann J óhanna Jóhannsdóttir, Lenka Ptácníková og Hallgerður Þorsteinsdóttir gerðu jafntefli en Sigurlaug Friðþjófsdóttir tapaði.
Til baka
Leita í greinasafni
Prenta grein
