Það er eitt atriði sem verður að telja þeim viðskiptajöfrum sem mest áberandi voru á Íslandi síðastliðin ár, til tekna. Handverk við smíð viðskiptaflétta og -snúninga var ótrúlega vandað – á heimsmælikvarða. Flækjustigið var með allra glæsilegasta hætti, svo að hæfustu endurskoðendur og lögfræðingar þurftu jafnvel margar vikur til að greiða úr. Heimildamenn Útherja kveða íslensku viðskiptafléttuhefðina vera framsækna og nýstárlega, enda hugmyndaauðgi eitthvað sem íslensku þjóðina hefur aldrei skort. Segja má að þessi hugmyndaauðgi sé nátengd þeim útbreidda sannleik að alkunn lögmál efnahagslífsins standist ekki þegar íslenska hagkerfið er til umræðu. Það minnsta sem íslenskir fjárfestar geta gert er að miðla þessari snilld áfram til almennings, sem og að opinbera sína afstöðu til álitaefna í íslenskri hagstjórn. Í beinni með Pálma og Kalla gæti verið flottur þáttur, þar sem fyrrverandi eigendur eitt sinn stöndugra fjárfestingafélaga gætu rætt ástand og horfur í hagkerfinu, með áherslu á lausnamiðaðar aðferðir sem allir gætu nýtt sér. Hvernig er fljótlegast að skrá íbúðina á dótturfélag í Lúx, sem selur hana áfram til Cayman-eyja með seljendaláni með einum gjalddaga árið 2075.
utherji@mbl.is
Til baka
Leita í greinasafni
Prenta grein
